«Tulpar-Talgo» vagondaryna mingender úshin qol júginiń salmaǵy 25 kılogramnan aspaýy kerek

ASTANA. KAZINFORM — «Jolaýshylar tasymaly» AQ poıyzben júk pen bagajdy tasymaldaý erejelerin eske saldy. 

Sapardyń jaıly ótýin qamtamasyz etý maqsatynda qol júginiń salmaǵy men ólshemine qatysty qoldanystaǵy normalardy saqtaý talap etiledi. Belgilengen shekterden asqan jaǵdaıda artyq júk temirjol vokzaldarynyń bagaj bólimshelerinde resmı tártippen qabyldanyp, tasymaldaýǵa rásimdeledi.

— Ýákiletti organnyń buıryǵyna sáıkes, jolaýshylar poıyzdarynda qol júgin tegin alyp júrýdiń normalary bekitilgen. Atap aıtqanda, «Tulpar-Talgo» vagondarynan quralǵan quramdarda salmaǵy 25 kılogramnan aspaıtyn jáne úsh ólshemniń qosyndysy 150 santımetrden aspaıtyn qol júgin tegin alyp júrýge bolady. Qalǵan vagondar úshin bul kórsetkish — 35 kılogrammǵa deıin, al ólshemi úsh jaqtyń qosyndysymen 200 santımetrden aspaýy tıis, — delingen habarlamada.

Sonymen qatar, jolaýshylar bólshektelip, qaptalǵan jáne kólemi qol júgin ornalastyrý oryndaryna syıǵan jaǵdaıda balalar arbasyn, qylqaıyq jáne motorsyz velosıpedti aqysyz alyp óte alady. Múgedektigi bar jolaýshylar jeke paıdalanýyna arnalǵan kómekshi tehnıkalyq quraldar men arnaıy qozǵalys quraldaryn qosymsha aqysyz alyp júrýge bolady.

Qol júgin jolaýshylar otyratyn oryndarǵa, ótkelderge, dálizderge jáne tambýrlarǵa ornalastyrýǵa qatań tyıym salynady. Belgilengen normadan asqan jaǵdaıda artyq qol júk nemese bagaj temirjol vokzaldarynyń bagaj bólimshelerinde resimdelýge tıis.

Bul qyzmet № 33/34 «Aqtóbe — Almaty», № 41/42 «Almaty — Atyraý», № 77/78 «Almaty — Mańǵyshlaq», № 691/692 «Aqtóbe — Atyraý», № 9/10 «Almaty — Astana»
baǵyttarynda kórsetiledi. Quny stantsııalar arasyndaǵy araqashyqtyqqa qaraı esepteledi jáne qoldanystaǵy tarıfter men erejelerge sáıkes aıqyndalady.

Mysaly, tanymal baǵyttarda jeke jáne zańdy tulǵalar úshin bagaj ben júk-bagajdy tasymaldaý quny (1 kg úshin) tómendegideı belgilengen:

• Almaty — Mańǵystaý: bagaj — 57 teńge, júk-bagaj — 114 teńge;
• Almaty — Astana: bagaj — 39 teńge, júk-bagaj — 94 teńge;
• Shymkent — Almaty: bagaj — 27 teńge, júk-bagaj — 57 teńge

Aıta keteıik, jolserikter arqyly júk jiberý zań talaptaryna sáıkes kelmeıdi jáne ákimshilik jaýapkershilikke, sondaı-aq qyzmetkerdiń jumystan bosatylýyna ákep soǵady.

Eske sala keteıik, buǵan deıin áýejaıda qol júgine qatysty jańa erejeler engizilgenin jazǵan edik.