«Tulpar-Talgo» jolaýshylary sapar boıy tegin kıno kórý múmkindigine ıe boldy
ASTANA. QazAqparat - Búginnen bastap «Astana-Almaty» jáne «Almaty-Petropavl» baǵytynda qatynaıtyn «Tulpar-Talgo» poıyzynyń 4 quramynda mýltımedııalyq oıyn-saýyq portaly iske qosylady.
Portal jolaýshylarǵa alýan janrdaǵy fılmderden, ártúrli oıyndardan taǵy basqa da qyzmetterden turatyn medıatekaǵa qosylýǵa múmkindik beredi. Onda otandyq jáne álemdik kınofılmder men mýltfılmderdiń aýqymdy toptamasy jınaqtalǵan jáne olar múmkindiginshe jańa ónimdermen jańǵyrtylyp otyrady. Barlyq medıakontentti joǵary sapada tamashalaýǵa bolady
Sondaı-aq, jolaýshylar portal arqyly poıyzdardyń júrý kestesimen tanysyp, qajetti qaladaǵy qonaqúı nemese taksı baǵasyn anyqtap, túrli jańalyqtardy oqyp, servıs jáne qyzmet kórsetý sapasyna qatysty óz pikiri men oı-usynystaryn jazyp qaldyra alady.
Mýltımedııalyq portalǵa qosylý «Grand», «Bıznes» jáne «Týrıst» vagondarynyń barlyq jolaýshylary úshin tegin. «Grand» pen «Bıznes» jolaýshylary vıdeotekany tolyq tegin kórse, «Týrıst» vagonynyń jolaýshylary tek fılmderdi ǵana qalaýynsha qosymsha aqy tólep tamashalaı alady.
Osy jyldyń aıaǵyna deıin bul qyzmet «Tulpar-Talgo» poıyzynyń barlyq 12 baǵytyna engizilmek.
Sonymen qatar, jýyrda «Tulpar-Talgo» poıyzdarymen poshtalyq korrespondentsııalardy jedel tasymaldaý qyzmeti («Qazposhta» AQ birge) de iske qosylmaqshy.
Qazirdiń ózinde Astana jáne Almaty-2 vokzaldarynda ornalasqan «Qazposhta» núktelerinde salmaǵy 3 kg deıingi sálemdemeler qabyldana bastady. Sizdiń sálemdemeńiz endi táýlikke jetpeıtin ýaqytta poıyzben dittegen jerine jekizilmek.
Jyldyń sońyna deıin bul qyzmet oblys ortalyqtaryn túgeldeı derlik qamtıtyn bolady, dep habarlaıdy «Jolaýshylar tasymaly» AQ baspasóz qyzmeti.
