«Tulpar-Talgo» poıyzdarynyń bıletterin satyp alýda jańa jeńildikter engizildi

ASTANA. QazAqparat - 1 aqpannan bastap «Tulpar-Talgo» poıyzdarynda aldyn ala bılet satyp alǵan jaǵdaıdaǵy jeńildikter merzimi uzartyldy, dep habarlaıdy «Jolaýshylar tasymaly» AQ baspasóz qyzmetinen.

«Eger buryn 35% jeńildik poıyzdyń júrýine 44 táýlikten 40 táýlikke deıin qalǵanda ǵana berilse, endi 35% jeńildikti poıyzdyń júrýine 10 táýlik qalǵanda bılet alǵan jaǵdaıda jáne 20% jeńildikti poıyzdyń júrýine 2 táýlik qalǵanda bılet alǵan jaǵdaıda paıdalanýǵa bolady. Máselen, qazir Astanadan Atyraýǵa deıin «Tulpar-Talgo» poıyzyna bılettiń bazalyq baǵasy 14 054 teńge bolsa, bıletti erterek satyp alsańyz, onyń baǵasy 9 223 teńgege deıin arzandaýy múmkin. Mundaı jeńildikterdi «Tulpar-Talgo» poıyzynyń 19/20 Astana-Atyraý, 87/88 Aqtóbe-Astana, 79/80 Astana-Shymkent, 77/78 Almaty-Atyraý, 49/50 Almaty-Aqtóbe, 89/90 Astana-Qyzylorda, 67/68 Astana-Óskemen, 69/70 Almaty-Óskemen, 35/36 Almaty-Shymkent baǵyttary boıynsha paıdalanýǵa bolady», delingen habarlamada.

Sondaı-aq «Jolaýshylar tasymaly» AQ buryn engizilgen «Jastar», «Qurmet», «Saıahatshy» dıskonttyq (jeńildikti) kartalarynyń kómegimen de bılet satyp alýǵa bolatynyn eske salady. Aldyn ala bılet alýdaǵy 35% jeńildikti eskersek, dıskontty kartalardy paıdalanǵan jaǵdaıda jolaýshy jalpy 52%-ǵa deıin jeńildikke qol jetkize alady.