«Tulpar» saýda ortalyǵy jıhazdaǵy qandala týraly daqpyrt taratqan adamdy sotqa bermek
ASTANA. QazAqparat - Astanadaǵy «Tulpar» saýda kesheniniń basshylyǵy WhatsApp messendjeri arqyly jıhazdaǵy qandala týraly jalǵan aqparat taraǵan adamdy sotqa bermekshi, dep xabarlaıdy QazAqparat tilshisi.
«WhatsApp uıaly messendjeri men áleýmettik jeliler arqyly taratylǵan aqparat shyndyqqa esh janaspaıdy. Sebebi saýda ortalyǵynda aı saıyn kene, qandala, tyshqan jáne taǵy basqa qurt-qumyrsqalarǵa qarsy dezınfektsııa jasalyp turady. Biz osy jumysty atqaratyn kompanııamen xabarlastyq. Olar da xalyq arasynda taratylǵan aqparatty joqqa shyǵaryp otyr. Ázirshe, biz ony kimniń taratqanyn bilmeımiz. Degenmen, búgin ishki ister organdaryna jiberiletin aryzdy daıyndadyq. Qylmystyq kodeks boıynsha jalǵan aqparat taratqany úshin tıisti jaýapkershilik bar. Soǵan sáıkes, biz ol adamdardy taýyp, óz quqyǵymyzdy, ataq-abyroıymyzdy qorǵaıtyn bolamyz», - deıdi «Galereıa Treıd» JShS-niń dırektory Sergeı Zobenko
Onyń aıtýynsha, jalǵan aqparatty taratqan qaskóıler básekelester bolýy da múmkin.
Aıta keteıik, jaqynda astanalyqtar arasynda WhatsApp messendjeri arqyly «Tulpar» saýda ortalyǵynda arzan baǵamen satylatyn jıhazdaǵy qandala týraly xabarlama taraǵan bolatyn.
«Qaıyrly kesh, kórshiler! «Tulpar» saýda úıinde matras jáne taǵy basqa jumsaq jıhazdy almaýdy eskerteıin dep edim. Sebebi ol jerde qandala qaptap ketken. Osyǵan baılanysty olar úlken satylymdy uıymdastyrǵaly jatyr. Meniń tanysym sol jerde isteıdi. Bul - naqty aqparat!» , - delingen orys tilindegi xabarlamada.
