Túlkibastyń baǵbandary 5 myń tonna «aport» almasyn jınady
TÚLKІBAS. QazAqparat - Túrkistan oblysynyń Túlkibas aýdanynda baǵbandar «aport» almasyn ósirip, 5 myń tonna jemis jınady. Búginde taýly aýdanda almanyń túrin kútip, baptaýdy 32 sharýashylyq qolǵa alǵan, dep habarlaıdy QazAqparat tilshisi.
Túlkibastyq sharýalar jyl sońyna deıin 6 myń tonna «aport» jınaýǵa qulshynyp otyr. Dámi til úıirer almalar búginde elimizdiń Almaty, Astana, Qaraǵandy qalalary men ózge de oblys ortalyqtaryna jóneltilýde. «Aporttyń» alma baýlarynan bosatylý baǵasy kelisine 250 teńgeni quraǵan.
Jalpy, aýdan aýmaǵynda qazirgi tańda 75 aýyl sharýashylyǵy taýaryn óndirýshi agroqurylym alma baýyn ósirýmen aınalysady. Olardyń deni «aport» almasynan bólek, «golden delıshes - zolotoı prevoshod» jáne «aıderet» atty suryptaryn ósiredi. Búginge deıin «golden delıshes - zolotoı prevoshod» almasynan 4,6 myń tonna terilse, «aıderetten» 5,4 myń tonna jınalyp otyr.
Aıta keteıik, 2017 jyly atalǵan alma túrleriniń jalpy kólemi 23 myń tonnany quraǵan bolatyn. Al, bıylǵy túsim munan da kóp bolmaq. Baý-baqsha baptaýshylar bıyl 5 myń tonnaǵa artyq alma jınap, 28 myń tonnadan astam jemis teremiz dep josparlaýda. Sebebi, bıylǵy aýa-raıy jemis-jıdekke qolaıly deıdi baǵbandar.
Jalpy, Túlkibas aýdanynda 3 myń gektardan astam alma baý alqaby bolsa, sonyń 2200 gektary jas baýlar sanalady. Munda barlyq sıymdylyǵy 12,5 tonnany quraıtyn 7 kókónis, jemis-jıdek saqtaıtyn qoımalar bar.
