Túlkibastyń almasy Reseıge eksporttalady
ShYMKENT. QazAqparat - Bıyl Ońtústik Qazaqstan oblysy Túlkibas aýdanyndaǵy alma baǵy 165 gektarǵa ulǵaıady. Onyń 120 gektary qarqyndy baý bolmaq, dep habarlaıdy OQO ákimdiginiń baspasóz qyzmeti.
Ákimdiktiń málimetinshe, jalpy baý kólemi 2 myń gektarǵa jetkizilip, onyń ishinde qarqyndy baý 400 gektar shamasynda bolady dep josparlanýda.
Búginde jergilikti bılik alma baý sharýashylyǵyn damytýdy kózdep otyr. Osy maqsatta oblys ákimdigi men aýyl sharýashylyq basqarmasy jáne aýdan ákimdigi tarapynan úsh jaqty kelisim túzilip, tıisti jumystar júrgizilýde.
Jasalǵan úshjaqty kelisim boıynsha 2025 jylǵa deıin alma baý kólemin 3210 ga jetkizý kózdelse, qarqyndy baý kólemin 1170 ga jetkizý josparlanýda. Nátıjesinde, osy jyldar ishinde jemis-jıdekterden jınalatyn ónim kólemi 80-90 myń tonnaǵa jetkizilmek.
Bul mejege jetýge aýdannyń tolyq múmkindigi bar. Al, jalpy aýdanda baý sharýashylyǵymen aınalysatyn 5 seriktestik pen 22 sharýa qojalyq bolsa, olardyń ishinde «Kóktal» sharýa qojalyǵy men «Kentaý» JShS-i bıyl Reseı eline ekologııalyq taza 600 tonna Túlkibas almasyn eksporttaýdy josparlap otyr. Atalǵan sharýashylyqtar baq ósirýde aldyńǵy qatarly elderdiń, onyń ishinde Túrkııa, Polsha memleketteriniń sońǵy úlgidegi ozyq tájirıbelerin paıdalanyp keledi.
Bul baýlarda negizinen tamshylatyp sýǵarý tehnologııasy qoldanylady. Baǵbandar barlyq qajetti baý-baqsha tehnıkasy bolǵan jaǵdaıda, sharýashylyq qyzmetkerleriniń eńbegi aıtarlyqtaı jeńildetiledi jáne agrotehnıkalyq sharalardy júrgizýge yńǵaıly bolady dep sanaıdy.
