Túlkibastyqtar aýdannyń 90 jyldyq mereıtoıyn atap ótti
TÚRKІSTAN. QazAqparat - Búgin Túlkibas aýdanynyń 90 jyldyǵy atalyp ótildi, dep habarlaıdy QazAqparat tilshisi.
Mereıtoı aıasynda aýdandaǵy M.Dýlatı atyndaǵy aýdandyq mádenıet úıinde «Tamyry tereń, tarıhy kemel - Túrkibasy» atty ǵylymı-praktıkalyq konferentsııa ótti.
Basqosýda alǵashqy sóz kezegin alǵan oblys ákimi Janseıit Túımebaev aýdan turǵyndaryn aıtýly merekemen quttyqtady.
«Prezıdentimiz «Bolashaqqa baǵdar: rýhanı jańǵyrý» baǵdarlamalyq maqalasynda Qazaqstannyń qasıetti oryndary, kıeli jerleri týraly erekshe jazǵan. Túrkistan oblysynda qasıetti de kıeli oryndar kóp. Bıyl bizdiń óńirde birneshe aýdan ózderiniń toqsan jyldyǵyn atap ótedi. Osy aýdan, aımaqtardyń bári de kıeli, qasıetti. Solardyń biri ári biregeıi - Túlkibas aýdany, Túrkibasy aımaǵy Qarataý men Alataýdyń túıisken tóri. Tarıhy tereń, tabıǵaty tańǵajaıyp Túlkibas aýdanynyń qurylǵanyna 90 jyl tolyp otyr. Árbir toı, jańa jumystardyń tolaǵaı, tirlikterdiń bastaýy bolýy tıis», - dedi Janseıit Qanseıituly.
Konferentsııada oblys basshysy aýdannyń bir top azamattaryn Alǵys hatpen marapattady. Konferentsııada qoǵam qaıratkeri Z.Turysbekov, ǵalymdar M.Myrzahmetov, D.Qojamjarova jáne D.Qamzabek baıandama jasap, jan-jaqty talqylanyp, taldady.
Merekelik jıyn Turar Rysqulov aýylyndaǵy «Tuńǵysh Prezıdent» saıabaǵynda jalǵasyn tapty. Saıabaqta ónerpazdar óz ónerlerin tartý etse, sporttyq jarystar men «Jaıdarman» oıyny halyqtyń kóńilin kóterdi.
Sondaı-aq, merekelik sharada aýdan qolóner sheberleri kórmesi qoıyldy. Merekeniń jalǵasy respýblıkaǵa, oblysqa tanymal ánshilerdiń gala kontsertimen jalǵasyp, is-shara sońy merekelik otshashýmen aıaqtaldy.
