Túlkibastyq polıtseıler esepte turǵan jasóspirimderdi saıahatqa alyp bardy
TÚLKІBAS. QazAqparat – Túrkistan oblysy Túlkibas aýdanynda polıtseıler minez-qulqy qıyndaý, esepte turǵan jasóspirimderdi kıeli oryndarǵa saıahatqa alyp bardy. Bul saıahat Túrkistan oblysy aýmaǵynda kámeletke tolmaǵandar arasyndaǵy qylmystar men quqyq buzýshylyqtardyń aldyn alý maqsatynda uıymdastyrylǵan «Jasóspirim» jedel-profılaktıkalyq is-sharasy aıasynda ótkizildi, dep habarlaıdy QazAqparat tilshisi.
Túlkibas aýdandyq polıtsııa qyzmetkerleri aldymen Jankent, B.Momyshuly, Turar, A.Asqarov, Lermontov jalpy orta mektepteriniń oqýshylary arasynda «devıantty» minez-qulyqty balalarmen túsindirý jumystaryn júrgizdi. Keıinnen bul balalar Túlkibas aýdanyndaǵy kıeli oryndarǵa saıahattap qaıtty. Atap aıtqanda, Túrkibasy, Aqtas, Tamshy bastaý áýlıelerdiń basyna baryp, zııarat jasady.
«Balalardy saıahatqa aparýdaǵy basty maqsat – jastar arasynda patrıottyq sezimdi oıatý, týǵan jerleriniń qorǵany bolýǵa shaqyrý. Sondaı-aq, bolashaqta tárbıeli-tártipti azamattar bolýǵatúsindirme jumystary arqyly yqpal etý»,- deıdi aýdandyq polıtsııa bóliminiń ınspektorlary.
Óz kezeginde saıahatqa shyqqan oqýshylar da polıtseılerge alǵys aıtty.
Aıta keteıik, atalǵan profılaktıkalyq shara oblys aýmaǵynda 18-25 qazan aralyǵynda ótýde. Túrkistan oblysynyń polıtseıleri osylaısha minezi qıyn balalardy durys jolǵa túsýge shaqyryp jatyr.
