Túlkibasta joǵalyp ketken eki bala aman tabyldy
TÚLKІBAS. QazAqparat - Túrkistan oblysy Túlkibas aýdanynda kitap ótkizýge mektepke ketken synyptas eki bala qaıtyp oralmaǵan. Olardy ózdiginen izdep tappaǵan ata-analary polıtsııaǵa aryzdanǵan, dep habarlaıdy QazAqparat tilshisi.
Oblystyq PD baspasóz qyzmetiniń málimetinshe, mektep oqýshylaryn izdegen Túlkibas APB-niń qyzmetkerleri 8-synyp oqýshylarynyń mektepke baryp, jarty saǵattan soń ketip qalǵanyn anyqtaǵan. Keıinnen ekeýiniń mektepten shyqqan soń, «Almaty-Termez-Tashkent» tas jolynyń boıynda Shymkent qalasy baǵytyna qaraı avtokólik toqtatyp turǵandary belgili bolǵan.
«Olar jaıynda Túrkistan oblysy Polıtsııa departamenti men Shymkent qalalyq Polıtsııa departamentine baǵyttamalar joldandy. Balalardy izdeý maqsatynda tártip saqshylarynan arnaıy top qurylyp izdestirý sharalary jasaldy. Oǵan qosa, qaladaǵy týystaryna habar berilip, olar da izdeý jumysyna atsalysty. Polıtseılerdiń shuǵyl izdestirý sharalarynyń nátıjesinde, ıaǵnı Túlkibas APB aǵa jedel ýákili polıtsııa maıory N.Ómiralıev jáne JPQ aǵa ÝPI polıtsııa maıory N.Satpaevtyń qyraǵylyǵynyń arqasynda Shymkent qalasynan kámelet jasyna tolmaǵan balalar tabylyp, aman-esen ata-analaryna tapsyryldy» delingen habarlamada.
Jaýap alý kezinde balalardyń uıaly telefondaryn satyp, qydyryp júrgeni belgili boldy. Óz kezeginde balalarymen aman-esen qaýyshqan ata-analary polıtseılerdiń jumystaryna rızashylyqtaryn bildirip, alǵystaryn aıtty.
