Túlkibasta jańa sport kesheni ashylady
TÚLKІBAS. QazAqparat - Túrkistan oblysynyń Túlkibas aýdanyndaǵy Sastóbe kentinde «Sport kúni» merekesine oraı jańa sport kesheni halyq ıgiligine beriledi, dep habarlaıdy QazAqparat.
Sastóbelik jastar jańa oqý jylyn jaqsy jańalyqpen qarsy almaq. Sebebi tamyz aıynyń úshinshi aptasy, ıaǵnı sport kúni merekesine oraı kent ortalyǵynan 240 adamǵa eseptelgen jańa sport kesheni paıdalanýǵa beriledi dep josparlanýda.
Memlekettik-jekeshelik áriptestik sheńberinde 454 mıllıon teńgege salynǵan sport ortalyǵynda boks, dzıýdo, ústel tenısi, basketbol, erkin kúres jáne taǵy da basqa sııaqty sport túrlerimen aınalysýǵa bolady. Sondaı-aq, kıim aýystyrýǵa, dýsh qabyldaýǵa arnalǵan arnaıy bólme jáne bapkerler men medbıkelerge arnalǵan bólmeler bar.
Búgingi tańda aýdanda 4 memlekettik sport mektepteri jáne 1 sport klýby halyqqa qyzmet kórsetedi. Onyń ishinde, 1 oblystyq, 3 aýdandyq balalar-jasóspirimder sport mektebi jáne 1 sport klýby sporttyń 16 túrinen 14 aýyldyq okrýgterdegi úsh myńǵa jýyq jastardy qamtıdy.
QR Tuńǵysh Prezıdenti – Elbasy N. Nazarbaev Qazaqstan halqynyń turaqty túrde sportpen shuǵyldanýy 2020 jylǵa deıin 30 paıyzǵa jetkizý kerektigin aıtqan bolatyn. Qazirgi tańda aýdanda turaqty túrde sportpen shuǵyldanýshylar sany 29,6 paıyzǵa jetti. Jyl sońyna deıin aýdan jastary men turǵyndaryn salaýatty ómir saltyn ustanyp, sportqa baýlý arqyly aýdandaǵy turaqty sportpen shuǵyldanýshylar sanyń 30 paıyzdan asyrý josparda bar.
