Túlkibasta jańa meshit paıdalanýǵa berildi
TÚLKІBAS. QazAqparat – Túrkistan oblysy, Túlkibas aýdanynda jańa meshit el ıgiligine paıdalanýǵa berildi. Qasıetti qurban aıt merekesi qarsańynda ashylǵan Alla úıi jergilikti turǵyndar men jeke kásipkerlerdiń demeýshiligimen salynǵan, dep habarlaıdy QazAqparat tilshisi.
Meshittiń ashylý saltanatyna Qazaqstan Respýblıkasy musylmandar dinı basqarmasynyń Túrkistan oblysy boıynsha ókili M.Aqtamberdi qatysyp, jańa meshit jastardy ımandylyqqa tárbıeleıtin ortalyqqa aınalatyndyǵyn aıtap ótti.Dástúrimizdiń, taǵylymǵa toly tarıhymyzdyń nasıhatshysy bolyp, dinı hám ǵylymı jańalyqtardyń jarshysy atanatyndyǵyn jetkizdi. Igi iske uıytqy bolǵan jandarǵa alǵysyn aıtty. Saltanatty ashylý rásiminde sondaı-aq, qazaq eline tanymal ánshi, memleket jáne qoǵam qaıratkeri, Qazaqstannyń eńbek sińirgen ártisi Nurlan Ónerbaev, aýdandyq máslıhattań hatshysy S.Seısenbaev jáne Túlkibas kentiniń bıi B.Sarybaev ta quttyqtaý sóz sóılep, jurtshylyqty qasıetti Qurban aıt merekesimen quttyqtady.
Shara barysynda aýdandyq máslıhattyń hatshysy S.Seısenbaev kindik qany tamǵan, týǵan jerine, ıgilikti is jasap jatqan Qaırat Aıtbaıǵa oblys ákimdigi tarapynan joldanǵan alǵys hatty tabys etti.
Aıta keteıik, Alla úıiniń qurylys sáýleti ulttyq naqyshpen turǵyzylǵan. Meshittiń konferentsııa zaly, kitaphanasy, eki dárishanasy, bir úlken áıelder zaly, neke jáne ımamdar bólmesi bar. Sonymen qatar qulshylyqqa kelýshilerge arnalǵan avtoturaqqa oryn bólingen. Munymen qatar, meshit aýmaǵynda ashanasy da qarastyrylǵan.
