Túlkibasta Turar Rysqulovtyń 125 jyldyǵy keń kólemde atalyp ótti
«Nur Otan» partııasy Túrkistan oblystyq fılıaly men Mádenıet jáne tilderdi damytý basqarmasy, Túlkibas aýdany ákimdigi uıymdastyrǵan sharaǵa oblys ákiminiń orynbasary Sáken Qalqamanov pen partııa fılıaly tóraǵasynyń birinshi orynbasary Beısen Tájibaev, oblystyq Qazaqstan halqy assambleıasy tóraǵasynyń orynbasar-hatshysy Ǵ. Rysbekov pen aýdan ákimi Nurbol Turashbekov, jazýshylar men ǵalymdar qatysty, dep habarlaıdy QazAqparat tilshisi.
Sultanbek Qojanov pen Turar Rysqulovtyń týǵanyna 125 jyl tolýyna oraı uıymdastyrylǵan «Aqsúmbe men Aqsý-Jabaǵyly arasy» avtosaparyna qatysýshylar 1915 jyly «Alash» qaıratkeri, tuńǵysh qazaq ınjeneri Muhametjan Tynyshpaevtyń basshylyǵymen soǵylǵan Jaskeshý aýyldyq okrýgi Rysqul aýylynyń mańynda ornalasqan tonnelmen tanysty.
Turar Rysqulovtyń ata qonysy Rysqul aýylyndaǵy kúrdeli jóndeýden ótken aýyldyq klýbtyń ashylý saltanatyna qatysty. Sonymen qatar, qonaqtar Túlkibas kentindegi toǵyz joldyń toraby - Túrkisib temirjolynyń boıynda ornalasqan qos qaıratker - M.Tynyshpaev pen T.Rysqulovtyń eskertkishine arnaıy baryp, gúl shoqtaryn qoıdy.
Budan bólek, T. Rysqulov atyndaǵy tarıhı-ólketaný murajaıymen tanysqan delegatsııa músheleri «Tuńǵysh Prezıdent» saıabaǵyn aralady. Taýly aýdanynyń 90 jyldyq mereıtoıyna oraı jóndeýden ótip, qaıta jańǵyrǵan saıabaqta kelgen qonaqtardy ulttyq kıimdegi júzden asa qyz kelinshekter kútip aldy. Olarǵa aýdannyń brendteriniń biri - alma jemisin tartý etti.
Aıtýly shara «Ult tarıhyndaǵy jarqyn tulǵa» atty taqyryptaǵy saltanatty jıynmen qorytyndylandy. Onda oblys ákiminiń orynbasary Sáken Qalqamanov Turar ómiri jaıly qysqasha baıandama jasap, «Nur Otan» partııasy oblystyq fılıaly tóraǵasynyń birinshi orynbasary Beısen Tájibaev qazaq halqynyń bolashaǵy úshin kúresken tulǵalardy keńinen nasıhattaý máselesin qamtydy.
Aıta keteıik, qazaqtyń qos taý tulǵasy - S.Qojanov pen T. Rysqulovtyń týǵanyna 125 jyl tolýyna oraı «Nur Otan» partııasynyń oblystyq fılıaly uıymdastyrǵan «Aqsúmbe men Aqsý-Jabaǵyly arasy» ekspedıtsııasy keshe Sozaq aýdanynda bastaý alyp, búgin Túlkibas aýdanynda máresine jetti.
