Túlkibasta túlekter kópbalaly otbasyǵa baspana alyp berdi

TÚLKІBAS. QazAqparat – Túrkistan oblysy Túlkibas aýdanynda mektepti 20 jyl buryn bitirgen túlekter kópbalaly otbasyǵa bes bólmeli úıdi tartý etti. Kútpegen jerden baspanaly bolǵan otbasy kúni búginge deıin aýdan ortalyǵyndaǵy jaldamaly páterde turyp kelgen, dep habarlaıdy QazAqparat tilshisi.

Hajibekovter januıasy kóp jyldan beri baspanaǵa qol jetkize almaı, otaǵasynyń birinshi top múgedektigine beriletin járdemaqy men ataýly áleýmettik kómek qarjysyna kúneltip kelgen. Osyny eskergen túlkibastyq azamattar qasıetti Ramazan aıynda muqtaj januıany qýantty. Abaı atyndaǵy mektep lıtseıin 2000-shy jyly bitirgen túlekter «Qamqorlyq» jobasynyń qatysýshysyna aýdan ortalyǵynan turǵyn úı alyp berdi. Igi sharaǵa aýdandyq máslıhat hatshysy S.Seısenbaev pen jazýshy, jýrnalıst M.Baıǵut bastaǵan Abaı mektebiniń 56 jyl buryn bitirgen túlekteri jáne aýdannyń bas ımamy M.Serik arnaıy qatysyp, Hajibekovter otbasyn jańa qonysymen quttyqtady. Shara sońynda dástúrge saı 2000 jylǵy túlekter qaıyrymdylyq estafetasyn 2001 jylǵy túlekterge ótkizdi. Osylaısha túlkibastyqtar búkil qazaq eline úlgi bolarlyqtaı ıgi isti dástúrge aınaldyryp otyr.

Aıta keteıik, mundaı ıgi shara Túlkibas aýdanynda alǵash ret oryn alyp otyrǵan joq. Sońǵy eki jyl qatarynan dál osy Abaı mektep lıtseıiniń 1998 jáne 1999 jyly bitirgen túlekteri kópbalaly jáne muqtaj otbasylarǵa baspana syılaǵan bolatyn. Odan ózge oblys ákimi Ómirzaq Shókeevtiń bastamasymen qolǵa alynǵan «Qamqorlyq» jobasy aıasynda taǵy eki otbasy jomart jandardyń demeýshiligimen baspanaly bolyp otyr.