Túlkibasta ótken saıatshylar merekesi keleshekte halyqaralyq deńgeıge kóterilmek
TÚRKІSTAN.QazAqparat - Búgin Túrkistan oblysy Túlkibas aýdanynda ótken Salbýryn saıatshylar festıvali ótti, dep habarlaıdy QazAqparat tilshisi.
Memleket basshysy «Uly dalanyń jeti qyry» atty maqalasynda qazaqy tanymda Jeti qazynanyń biri sanalatyn jylqyǵa erekshe toqtalǵan bolatyn. Osyǵan oraı, oblys ákimi Janseıit Túımebaevtyń bastamasymen ulttyq qundylyqtar men týrızmdi damytýǵa arnalǵan sharalar josparynyń biri retinde "Salbýryn mereke ǵoı saıatshyǵa" degen ataýmen festıval taý etegindegi Jabaǵyly aýylynda ótti.
Túp-tamyrymyzǵa úńilip, sana túkpirindegi ulttyq rýhty oıatý maqsatynda uıymdastyrylǵan shara aıasynda qonaqtar búrkit, tazylardyń ań alý jáne jamby atý kórinisterine tánti boldy. Shara sońynda saıatshylar saıysynyń qorytyndysy shyǵaryldy. Merekede ár saıystyń túrine baılanysty baǵy janǵandardyń mereıi ústem bolyp, birqatar qusbegiler men tazy baptaýshylar marapatqa ıe boldy. Mereke sońy kontserttik baǵdarlamaǵa ulasty.
Bıylǵy festıvaldiń bir ereksheligi, Elbasymyzdyń bıylǵy jyldy Jastar jyly dep jarııalaýyna oraı sharaǵa Túrkistan oblysymen qatar shetelden de jastar kelip qatysty. «Salbýryn mereke ǵoı saıatshyǵa» festıvali osylaısha keleshekte respýblıkalyq, halyqaralyq deńgeıge kóterilmek. Túrki tildes memleketterdiń ortaq brendi ári dástúrli merekesine aınalmaq.
Aıta keteıik, buǵan deıin Túlkibas aýdanynda "Salbýryn mereke ǵoı saıatshyǵa" atty festıval bastalǵanyn habarlaǵan bolatynbyz. Halyqaralyq deńgeıde ótken sharaǵa óńirdiń qala-aýdandaryndaǵy saıatshylardyń 15 búrkit, 16 tazysy qatystyrylýda. Uıymdastyrýshylardyń sózinshe, osyndaı is-sharalardy ótkizý jyldan-jylǵa óz nátıjesin berýde.
Máselen, byltyr Túrkistan oblysyna alys-jaqyn shet memleketterden kelýshiler sany 7,7 paıyzǵa artqan. Bir ǵana Túrkistan qalasyna 1 mıllıonnan astam týrıst taban tirese, 2025 jylǵa qaraı bul kórsetkishti 5 mıllıonǵa jetkizý kózdelip otyr.
