Túlkibasta «Óńir jáne tulǵalar» atty tarıhı derekti konferentsııa ótti
TÚLKІBAS. QazAqparat – Túrkistan oblysy, Túlkibas aýdanynda «Óńir jáne tulǵalar» atty tarıhı derekti konferentsııa ótti. Halqymyzdan shyqqan asyl azamattardyń keıingi urpaqqa qaldyrǵan eńbekterin nasıhattaý men tarıhı tulǵalardyń beınesin keńinen ashý maqsatynda uıymdastyrylǵan jıynǵa elimizge tanymal qaıratkerler men zııaly qaýym ókilderi qatysty, dep habarlaıdy QazAqparat tilshisi.
Konferentsııanyń ashylý saltanatynda aýdan ákimi Nurbol Turashbekov sóz sóılep, kópshilikti aýdan aýmaǵynda atqarylyp jatqan jumystarmen tanystyryp ótti. Taǵylymdy jıyn barysynda QR Parlament Májilisiniń depýtaty Darhan Myńbaı men jazýshy, jýrnalıst, Qazaqstannyń eńbek sińirgen qaıratkeri Marhabat Baıǵut, Baýyrjan Momyshulynyń kelini, otbasylyq qundylyqtardy nasıhattaýshy Zeınep Ahmetova men respýblıkalyq D.Qonaev qorynyń tóraǵasy Asanbaı Alseıitov, Halyqaralyq Jambyl atyndaǵy syılyqtarynyń ıegeri jazýshy Dohtyrhan Turlybek pen fılolog, professor, «Qurmet» ordeniniń ıegeri Dıhan Qamzabekuly baıypty baıandama jasady. Túlkibas óńiriniń týmalary, qazaq eliniń maqtanyshy Turar Rysqulov, Baýyrjan Momyshuly, Sherhan Murtaza syndy uly tulǵalar týraly túıindi oılaryn aıtty.
Konferentsııa sońynda Sh.Murtaza atyndaǵy «Ýaqyp» qorynyń prezıdenti, saıası ǵylymdarynyń doktory Qaırat Aıtbaı el úshin týǵan erlerdi jan-jaqty zerttep júrgen azamattarǵa jáne týǵan týystaryna Sh.Murtaza qorynyń atynan syılyqtardy tabys etti. Sondaı-aq, bıylǵy jyly Túlkibas aýdanyndaǵy barlyq bilim oshaqtarynda qazaq eliniń maqtanyshtary týraly shyǵarmashylyq konkýrstar uıymdastyrý úshin 1 mln teńge taǵaıyndalǵanyn jetkizdi.
Konferentsııa barysynda qonaqtar Túlkibas óńirinen shyqqan tulǵalar jaıynda halyqtyq kórmeni tamashalady.
