Túlkibasta «Nur Otan» kadrlyq rezervine irikteýge 100 úmitker qatysýda

TÚLKІBAS. QazAqparat – Túrkistan oblysy, Túlkibas aýdanynda «Nur Otan» partııasynyń kadrlyq rezervine irikteýdiń ekinshi kezeńine úgit-nasıhat jumystary bastaý aldy. Osyǵan oraı, aýdanǵa qarasty Sastóbe kenti men Keltemashat, Arys jáne Balyqty aýyldyq okrýgterindegi úmitkerlermen kezdesýler ótti, dep habarlaıdy QazAqparat tilshisi.

Aýdanda úmitkerlermen kezdesýge «Nur Otan» partııasy Ortalyq apparatynyń ókili Madııar Daýyrbaev pen partııanyń oblystyq fılıaly tóraǵasynyń birinshi orynbasary Beısenbaı Tájibaev, fılıal tóraǵasynyń orynbasary Polat Tursynbaev, oblystyq «Jas Otan» jastar qanatynyń atqarýshy hatshysy Juldyz Namaz, partııanyń aýdandyq fılıalynyń músheleri men BAQ ókilderi qatysty.

Kezdesýler barysynda ár aýyldyq okrýgten partııanyń kadrlyq rezervine úmitkerlerdiń baǵdarlamalyq baıandamalary tyńdalyp, saıası uıymnyń aldaǵy jumysyn jetildirý maqsatynda oı-pikirler aıtyldy.

Kadrlyq irikteý jumystarynyń nátıjesi boıynsha aýdan turǵyndarynyń arasynan 100 úmitker tirkelip, qujat tapsyrǵan. Jas erekshelikterine oraı tirkelgen úmitkerler arasynda 35 jasqa deıin 21 adam, 35-50 jas aralyǵynda 38 adam, 50 jastan joǵary 41 adam baq synamaq. Sondaı-aq úmitkerler arasynda 7 kópbalaly ana da ózin usynǵan. Úmitkerlerge daýys berý 16 qarasha kúni aýdannyń 15 aýmaǵynda ótkiziledi dep kútilýde. Daýys berý oryndary retinde memlekettik emes mekemelerdiń ǵımarattary tańdalyp alyndy. Árbir úmitker óz baǵdarlamalaryn aldaǵy ýaqytta jergilikti BAQ pen óziniń áleýmettik jelilerine jarııalaýǵa mindetti. Іrikteýden ótip, partııa músheleriniń kóp daýysyna ıe bolǵan azamattar keleshekte partııa jumysyna tartylyp, halyqpen tikeleı jumys isteýge múmkindik almaq.