Túlkibasta múmkindigi shekteýli balalar arasynda jarys ótti
TÚLKІBAS. QazAqparat – Túrkistan oblysy, Túlkibas aýdanynda múmkindigi shekteýli balalar arasynda jarys uıymdastyryldy, dep habarlaıdy QazAqparat tilshisi.
Aýdandyq jumyspen qamtý jáne áleýmettik baǵdarlamalar bóliminiń «Halyqqa áleýmettik qyzmet kórsetetin aýdandyq aýmaqtyq ortalyǵynda» emdelip jatqan jetkinshekter shashka, shahmat, domıno sııaqty sporttyq oıyn túrlerinen ózara myqtyny anyqtady.
Aýdandyq sport bólimi uıymdastyrǵan jarystar kámelet jasyna tolmaǵan jarymjan balalardyń kúndizgi qatynaý bólimshesinde ótti. Shara barysynda eń aldymen múmkindigi shekteýli balalarǵa arnalǵan «Jaqsy kóńil kúı – jan tynyshtyǵy» atty psıhologııalyq trenıng uıymdastyryldy.
Trenıngtiń maqsaty balalardy qorshaǵan ortada ózin erkin ustaýǵa, aınaladaǵy adamdarmen qarym –qatynas qurýdy úıretý boldy. Odan bólek balalardyń damýyna qaraı ár túrli oıyn jattyǵýlary ótkizildi. Jalpy sporttyq oıyndarǵa qatysqan barlyq 24 balaǵa sport bóliminiń uıymdastyrýymen jáne demeýshiligimen baǵaly syılyqtar úlestirildi.
Atalǵan sporttyq sharaǵa arnaıy kelgen sport bóliminiń basshysy P. Abıhanov jáne bas mamany B. Temirálıev osyndaı ıgi sharalar aldaǵy ýaqytta da óz jalǵasyn tabatynyn jetkizdi.