Túlkibasta mindetti áleýmettik medıtsınalyq saqtandyrý sharttary túsindirildi

TÚLKІBAS. QazAqparat – Túrkistan oblysy, Túlkibas aýdanynda mindetti áleýmettik medıtsınalyq saqtandyrýdyń sharttary túsindirildi, dep habarlaıdy QazAqparat tilshisi.

Oblystyq qoǵamdyq densaýlyq saqtaý basqarmasynyń basshysy Muqan Egizbaev pen «Áleýmettik medıtsınalyq saqtandyrý qory» KEAQ Túrkistan oblysy boıynsha fılıalynyń dırektory Ashat Beısenbaev bastaǵan top aýdan turǵyndarymen kezdesip, jańa júıedegi tegin medıtsınalyq kómek týraly aıtyp ótti.

Jıynda sóz alǵan Muqan Egizbaev jańa júıe júzege asqan soń medıtsınalyq qyzmetterdiń sapasy aıtarlyqtaı jaqsaratynyn jetkizdi. Emdeý mekemelerinde básekelestik artyp, ár adam ózine unaǵan dárigerdi nemese emhanany tańdaı alady.

«MÁMS paketine tabysy ortasha azamattardyń qaltasy kótere bermeıtin: MRT, kompıýterlik tomografııa, PTsR-analız syndy qyzmetter de engizildi. Sondaı-aq, kepildendirilgen tegin kómek paketine enbegen syrqattarǵa shaldyqqan jaǵdaıda statsıonardy almastyratyn kómek pen josparly statsıonarlyq kómekter osy paket sheńberinde kórsetiledi.Aıta keterligi, elimizdegi kenjelep qalǵan medıtsınalyq ońaltý, qalpyna keltirý kómekteri joǵary tarıftermen keń aýqymda kórsetiledi»,- dedi oblystyq qoǵamdyq densaýlyq basqarmasynyń basshysy.

Mamandardyń sózinshe, 2020 jyldyń 1 qańtarynan bastap barlyq qyzmetkerler áleýmettik medıtsınalyq saqtandyrýdyń tolyqqandy qatysýshysy bolady. Sóıtip sapaly jáne qoljetimdi medıtsınalyq kómekpen qamtamasyz etiledi.

«Al, jumysqa resmı túrde ornalaspaǵan, jeke kásipker retinde tirkelmegen, azamattyq-quqyqtyq sıpattaǵy kelisimshart boıynsha qyzmet kórsetpeıtin azamattar derbes tólem jasaýshylar sanatyna jatady. Sondyqtan MÁMS júıesine qatysý úshin olar biryńǵaı jıyntyq tólem (BJT) jasaýy qajet», – dedi Ashat Beısenbaev.

Aıta keteıik, oblys aýmaǵynda bıyl qormen kelisimshart bekitken jetkizýshi medıtsınalyq uıymdarǵa 76,8 mlrd teńge tólenýde. Bul ótken jyly bólingen qarjydan 9,1% artyq. Jalpy, medıtsınalyq saqtandyrý qory kepildendirilgen kómek túrlerin kórsetýge qulshynys bildirgen 74 medıtsına uıymdarymen kelisimshart bekitken bolatyn. Onyń ishinde 34-i - jeke menshik klınıkalar. Jumys kestege saı júrip jatyr. Bólingen qarajat medıtsına mekemeleriniń operatsııalyq shyǵyndaryn óteýge jetkilikti.

Eger qandaı da bir medıtsınalyq uıym qyzmet kórsetýden bas tartsa nemese qyzmet sapasyz kórsetilse, elimizdiń árbir turǵyny 1406 baılanys ortalyǵyna habarlasa alady.