Túlkibasta kúrdeli jóndeýden ótken mektep qaıta paıdalanýǵa berildi

TÚLKІBAS. QazAqparat – Túrkistan oblysy Túlkibas aýdanynda kúrdeli jóndeýden ótken mektep jańa oqý jylynda qaıta paıdalanýǵa berildi. A. Pýshkın atyndaǵy aqparattyq tehnologııalar mektep-lıtseıindegi jóndeý jumystary maýsym aıynda bastalyp, tamyzda aıaqtaldy, dep habarlaıdy QazAqparat tilshisi.

Qyrkúıek aıynan bastap atalǵan mekteptiń oqýshylary zaman talabyna saı qaıta jasaqtalǵan bilim uıasynda sabaq oqyp júr. Jóndeý jumystary barysynda ishki elektr jelileri tolyǵymen jańartylyp, esikteri aýystyryldy. Mekteptiń ishi-syrty boıalyp, 1050 sharshy metr lınoleým tóseldi. Akt zalynyń sahnasy aýystyrylyp, sport zaly tolyǵymen jańartyldy. Qosymsha demeýshiler esebinen ashana jóndeýden ótip, 224 dana jalıýz alyndy. Mektep aýlasyna jańa asfalt tóselip, aıaq joldar men jıektas aýysty.

Jalpy qurylyspen «Spetsteh-1 JShS» aınalysyp, mamandar qurlys jumystarynyń joǵary deńgeıde jasalǵanyn aıtyp otyr.

Kúrdeli jóndeý jumystarynan bólek, mektepke jańadan salynyp jatqan qosymsha ǵımarattyń da qurylysy qarqyndy júrýde.

Bilim salasyndaǵy mundaı betburysqa turǵyndar dán rıza. Jańa ǵımaratta bilim nárimen sýsyndaǵan shákirtterdiń de qýanyshynda shek joq. Kúrdeli jóndeýden ótken bul mektep bolashaqta oqýshylardyń sapaly bilim alýyna negiz bolatyny sózsiz.