Túlkibasta qaıyrymdy jandar aýrýhanaǵa 10 ottegi kontsentratoryn alyp berdi

TÚLKІBAS. QazAqparat - Túrkistan oblysynyń Túlkibas aýdandyq ortalyq aýrýhanasyna qaıyrymdy jandar 10 ottegi kontsentratoryn syıǵa tartty, dep habarlaıdy QazAqparat.

«Týǵan jerge taǵzym - ár perzenttiń paryzy» degendeı, ózge aımaqta turyp jatsa da, týǵan jerin umytpaı, qıyn sátte qamqorlyq jasap jatqan azamattar qatary Túlkibas aýdanynda kún sanap artyp keledi.

Búgin elin súıgen azamattar pnevmonııamen kúreste asa qajet ottegi kontsentratorynyń 10 danasyn aýdandyq aýrýhanaǵa tabystady.

Aıta ketsek, Túlkibas aýdanynyń týmasy, «Jigitter» kvartetiniń prodıýseri Erǵalı Ábdiraıymov ottegi kontsentratorynyń 5 danasyn jáne «Nur Max» qurylys kompanııasynyń dırektory Lesaly Abzal esimdi azamat 5 danasyn tartý etti.

Aýdan týmalary qandaı qıyn kezeń bolmasyn, týǵan jerine qoldaý kórsetip, qol ushyn sozýǵa daıyn ekenin jetkizip, aq halatty abzal jandardyń jumysyna sáttilik tiledi.