Túlkibasta qarqyndy baý kólemi jyl saıyn artyp keledi
NUR-SULTAN. QazAqparat - Túrkistan oblysynyń ákimi Ómirzaq Shókeev Túlkibas aýdanynda jumys saparymen boldy. Onda aldymen Balyqty aýyldyq okrýgindegi «Kas - Beton» JShS-niń jumysymen tanysty, dep habarlaıdy oblystyq ákimdiktiń baspasóz qyzmeti.
2008 jyly jumysyn bastaǵan seriktestik jylyna 500 myń tonna tsement óndiredi. Búginde jergilikti halyqty turaqty jumys ornymen qamtamasyz etýde.
Sapar aıasynda óńir basshysy Arys aýyldyq okrýgindegi «Aqsanat ınjınırıng» JShS-niń týrızm jáne balyq sharýashylyǵy baǵytyndaǵy jumysymen tanysty. Seriktestik búginde asyltuqymdy jylqylar men bekire tuqymdas balyq túrlerin ósirýmen aınalysady.
Sondaı-aq, oblys ákimi «Móldir» JShS-niń alma baýy men qoıma tsehyn aralady. Qazirgi tańda qojalyqtyń jer kólemi - 1 134,4 gektar. Atap aıtqanda, 154 gektarǵa - alma, 210,5 gektar jerge - júzim, 230 gektarǵa - dándik daqyldar, 104,4 ga - maıly daqyldar, 491 ga - jońyshqa egilgen, al 313,5 ga - jaıylym jer. 2015 jyly 110 gektar jerge ıntensıvti baý otyrǵyzylsa, 2018 jyly 600 tonna alǵashqy ónim jınalǵan. Sharýa qojalyǵynyń jumysymen tanysqan aımaq basshysy baý kólemin ulǵaıtyp, jemis túrin ártaraptandyrý qajettigin aıtty.
Budan soń Ómirzaq Estaıuly T.Rysqulov aýylyndaǵy kópqabatty turǵyn úılerdiń qurylysy, ınfraqurylym jumystary jáne sý tazartý júıelerimen tanysty. Táýligine 250 m3 qarqyndy sýdy tazalaıtyn jobanyń jyldyq sý burýy - 91 myń m3. Jumys barysymen tanysqan oblys ákimi aýdandyq óńirlerde kópqabatty úılerden góri baǵasy qoljetimdi jeke turǵyn úı alqaptaryn kóbeıtý qajettigin tapsyrdy.
Sonymen qatar, óńir basshysy «Batys Qytaı - Batys Eýropa» avtodáliziniń Shaqpaq aýylyndaǵy qos týnelldiń qurylys jumysyn kórdi. Nysannyń qurylysy 2018 jyly bastalǵan. Bıyl nysan paıdalanýǵa beriledi dep kútilýde. Týnelldiń jalpy uzyndyǵy - 860 m. Búgingi tańda betondaý jumystary 50 paıyzǵa aıaqtalyp otyr. Sol jaq týnelldiń 75 metr alqaby talapqa saı kelmegendikten, qaıta jóndeýden ótkizilýde. Ómirzaq Estaıuly týnnel jumysyn qarqyndatyp, nysandy ýaqytyly tapsyrý qajettigin tapsyrdy.
Saparda aımaq basshysy «Kentaý» JShS-niń alma baýy jáne qoımasyna aıaldady. Alma suryptarymen tanysqan aımaq basshysy baý men ónim kólemin arttyrýda memlekettik kómek kórsetiletinin baıandap, jınalǵan ónimdi qaıta óńdeý jumystaryna kóńil bólý qajettigin aıtty. 
