Túlkibasta birneshe kólik qar qursaýynan shyǵaryldy
TÚRKІSTAN. QazAqparat – Túrkistan oblysy Túlkibas aýdanynan qar qursaýynan birneshe kólik shyǵarylǵan. Aýdandyq polıtsııa qyzmetkerleri kóligi aryqqa túsip ketip, qarǵa kómilip qalǵan júrgizýshige kómek kórsetken, dep habarlaıdy QazAqparat tilshisi.
Oblystyq PD baspasóz qyzmetiniń málimetinshe, polıtsııa maıory Álimjan Qaraqulov pen polıtsııa aǵa serjanty Jalǵasbek Pirtaev jol boıynda áýre sarsańǵa túsip jatqan júrgizýshi men birneshe eriktilerdi baıqaıdy. Eki polıtseı de olardyń qasyna kelip, kólikti qar qursaýynan óz kúshterimen shyǵarmaqshy bolady. Alaıda 4-5 adamnyń kúshi qarǵa batyp qalǵan kólikti shyǵarýǵa jetpeıdi. Sodan soń tártip saqshylary aýyr kólikterdiń kómegine júginedi. Jolda ketip bara jatqan traktordy toqtap, onyń kúshimen jeńil kólikti shyǵaryp alady. Óz kezeginde polıtsııa qyzmetkerleriniń birden kómekke umtylyp, janashyrlyq tanytqanyna júrgizýshi rızashylyǵyn bildirgen.
Aıta keteıik, qys mezgili bastalǵaly beri Túlkibas aýdanynda osyndaı qolaısyz jaıtqa tap bolǵan 4 kólikke kómek kórsetilgen.
