Túlkibasta 5 myń gektar sýarmaly jer qaıta aınalymǵa qosylady
TÚRKІSTAN. QazAqparat - Túrkistan oblysynyń Túlkibas aýdanynda 5 myń gektar sýarmaly jer qaıta aınalymǵa qosylady, dep habarlaıdy QazAqparat Óńirlik kommýnıkatsııalar qyzmetine silteme jasap.
Aýdanda kóp jyldan beri sheshimin tappaı kele jatqan aǵyn sý máselesi kezeń-kezeńimen sheshimin taýyp keledi.
«2022 jylǵa deıin aýdan aýmaǵyndaǵy 13 sý nysanyna kúrdeli jóndeý jumysy júrgizilip, nátıjesinde 7 015 gektar sýarmaly jer qaıta aınalymǵa qosylatyn bolady. Bıyl jyl sońyna deıin 13 sý nysanynyń 7-ýi temir betonmen qaptalady. Jalpy uzyndyǵy 69,1 shaqyrym «Qulyı», «Tanta», «Qyzyl», «Boz», «Uzyn», «Besqasqa», «Bala Qulan» magıstraldy kanaldary 5 064 gektar aýyl sharýashylyǵy baǵytyndaǵy jerdi aǵyndy sýmen qamtymaq», delingen habarlamada.
Kúrdeli jóndeý jumystary qarqyndy júrip jatqan sý nysandaryn aralaǵan aýdan ákimi Nurlan Baıǵut merdiger mekeme ókilderine aldaǵy jańbyr maýsymyna jetkizbeı qurylys jumysyn qarqyndatýdy usyndy. Ol úshin jumysshylar sanyn kóbeıtip, arnaıy jumys kestesin qurýdy tapsyryldy. Sondaı-aq, ár ýchaskeden shyqqan qurylys qaldyǵyn arnaıy belgilengen orynǵa shyǵarý júktelip, jumystyn sapaly bolýyn qadaǵalaý maqsatynda kanal qabyrǵasyn bekitý úshin qoıylyp jatqan temir betondardyń laboratorııalyq synamasyn alyp turý eskertildi.
Mamandardyń aıtýynsha, atalmysh temir betondy ınjınerlik-qurylǵylardan jasalǵan sý nysandary aýdan turǵyndaryna keminde 25 jyl qyzmet etpek.
