Túlkibasta 143 gektar jerge ınfraqurylym júrgizilmek
TÚLKІBAS. QazAqparat - Ótken jyly Túlkibas aýdanynda jalpy 19 nysannyń qurylys jumystary iske asyp, 10 nysan el ıgiligine paıdalanýǵa berilgen. Al, 9 nysannyń qurylysy bıylǵy jylǵa ótpeli, dep habarlaıdy QazAqparat Túrkistan oblysy ákiminiń baspasóz qyzmetine silteme jasap.
Máselen, halyq sanynyń artýyna baılanysty Shaqpaq baba eldi mekenindegi Breýsov mektebiniń janynan 200 oryndyq zamanaýı bilim oshaǵy, Túlkibas kentindegi Şevtsov jáne Jylandy eldi mekenindegi Koshevoı mektebiniń janynan 150 oryndyq qosymsha ǵımarat boı kótergen. Al, Abaı eldi mekenindegi Altynsarın, Seslavıno eldi mekenindegi Seslavıno jáne Myńbaı aýylyndaǵy Jambyl mektebiniń janynan salynyp jatqan 150 oryndyq ǵımarat qurylysy bıyl aıaqtalady dep josparlanǵan.
Sonymen qatar, Balyqty aýyldyq okrýgi men Sastóbe jáne Túlkibas kentteriniń sheginen jer kezegindegi turǵyndardyń ótinishin qanaǵattandyrý maqsatynda 143 gektardy quraıtyn 673 jer telimine qajetti ınfraqurylym júrgizý jumystary qarqyn alǵan. Atalmysh Túlkibas jáne Sastóbe kentine elektr baǵanalaryn ornatý jumystary tolyǵymen aıaqtalyp, Balyqty eldi mekenindegi jumystar 85 paıyzǵa jetken.
Sý júıesin júrgizý boıynsha qazirgi tańda Balyqty aýyldyq okrýgindegi 53,8 gektar jerdiń (396 jer telimi) 90 paıyzy, Túlkibas kentinde 34,6 gektar jerdiń (127 jer telimi) 55 paıyzy aıaqtalǵan.
Aıta keterligi, turǵyn úı qurylysy boıynsha ótken jyly aýdan ortalyǵynda 24 páterli kópqabatty turǵyn úı paıdalanýǵa berilse, Sastóbe kentindegi 64 páterli kópqabatty turǵyn úıdiń qurylysy bıylǵy jylǵa ótpeli.
