Túlkibasta 100-den asa jas kásipkerlikti meńgerip shyqty

TÚLKІBAS. QazAqparat – Túrkistan oblysy Túlkibas aýdanynda 107 jas kásipkerlik kýrsyn aıaqtady. Osyǵan oraı aýdan ortalyǵynda «Jas kásipker» kýrsyn aıaqtaǵan jastarǵa sertıfıkat tapsyrý sharasy ótti, dep habarlaıdy QazAqparat tilshisi.

Atalǵan sharada sóz alǵan aýdan ákiminiń orynbasary E.Kúzembaev el bolashaǵynyń baıandy da tuǵyrly bolýy - sol eldiń jastarynyń qolynda ekenin atap ótti. Jastardyń bilimdi de bilikti bolýyna jaǵdaı jasaý ár ýaqytta da nazardan tys qalmaıtynyn jetkizdi. Óziniń jeke kásibin ashýǵa úlken qadam jasaǵaly turǵan aýdan jastaryna sáttilik tilep, oqý sertıfıkatyn tapsyrdy.

«Elbasymyz Nursultan Nazarbaev ótken jylǵy Joldaýynda 2019 jyldy jastar jyly dep jarııalaǵan bolatyn. Tuńǵysh Prezıdentimiz jastardyń búgini men bolashaǵyna qamqorlyq jasaýdy óz saıasatynyń negizgi máni dep sanaıdy. Óıtkeni jastar qoǵamnyń bir bóligi retinde memlekette mańyzdy ról atqarady», - dedi aýdan ákiminiń orynbasary.

Shara barysynda jas kásipkerlerdiń óz qolymen daıyndaǵan buıymdary men taǵamdarynyń kórmesi uıymdastyrylyp, aýdandyq mádenıet úıiniń ónerpazdary tarapynan daıyndalǵan kontserttik baǵdarlamamen jalǵasty.

Aıta keteıik, «Jas kásipker» oqý kýrstaryn aıaqtaǵan jastar jeke kásibin ashýǵa memleket tarapynan beriletin 505 myń teńge qaıtarymsyz grantqa úmitker atanyp otyr.