Túlkibasqa jyl basynan beri 13 myńnan astam týrıst kelgen
TÚRKІSTAN. QazAqparat - Túrkistan oblysyna qarasty Túlkibas aýdanyna aǵymdaǵy jyldyń 10 aıynda 13 myńǵa jýyq týrıst kelgen. Onyń ishinde 700 adam - shetel azamattary. Bul týraly Óńirlik kommýnıkatsııalar qyzmetinde ótken brıfıngte aýdan ákimi Nurbol Turashbekov málimdedi, dep habarlaıdy QazAqparat tilshisi.
Nurbol Turashbekovtyń sózinshe, taýly aýdan etnotýrızmdi damytýǵa qolaıly aımaq sanalady. Aldaǵy ýaqytta munda kelýshilerdiń sany arta túsedi dep josparlanýda. Aýdan ákimi sondaı-aq Túlkibastyń ekonomıkalyq jaǵdaıyna da toqtaldy. Búginde ekonomıkalyq belsendi halyq sany - 57,2 myń adamdy qurasa, jumyspen qamtylǵandar qatary 54,2 myń adamǵa jetken.
«Tehnıkalyq jáne kásiptik bilimi bar kadrlardy daıarlaý boıynsha bes oqý ornymen kelisim-shart túzilip, 195 azamat qysqa merzimdi kásiptik oqý kýrstaryna joldandy. Al, jappaı kásipkerlikti damytý «Bastaý-bıznes» jobasy negizinde 166 azamat kásipkerlik negizderine oqýǵa joldanyp, 157 adam sertıfıkat aldy. 52 azamatqa 207,8 mln teńge nesıe berildi. Áleýmettik jumys oryndaryna 142 azamat jiberildi», - dedi Nurbol Turashbekov.
Sonymen qatar, aýdandaǵy 44 balabaqshada 6560 búldirshin tárbıelenip jatyr. Balalardy qamtý kórsetkishi jyl qorytyndysymen 97,8 paıyzdy quraǵan. Infraqurylym boıynsha aýdandaǵy 62 eldimekenniń 59-y ortalyqtandyrylǵan aýyz sý qubyrymen qamtamasyz etilgen. Kógildir otynmen qamtýda aýdandaǵy 62 eldi mekenniń 60-y gazben qamtylǵan. Aýdandaǵy 5 eldimekenniń kóshelerin ortasha jóndeý jumystaryna 149,8 mln teńge bólinip, onyń 145,5 mln teńgesi ıgerildi.
