Túlkibasqa bir jylda 17 myńnan asa týrıst kelgen - aýdan ákimi
Aýdan ákiminiń málimetinshe, halyqty jumyspen qamtý maqsatynda jalpy somasy 6094 mln teńge bolatyn 33 joba iriktep alynǵan. Búgingi kúni 30 joba iske asyrylǵan. Onyń ishinde 7 joba - óz qarajaty esebinen, 23-ine qarjy ınstıtýttary nesıe bergen.
«Júzege asyrylǵan jobalardyń arasynda otbasylyq sút fermalaryn, mal bordaqylaý alańdaryn salý, eshki fermalaryn ashý, bıe saýatyn sharýashylyq, kól-taýarly balyq sharýashylyǵyn damytý, sút óńdeý nysandaryn qurýǵa qaralǵan jobalar bar. Aýdanda shaǵyn jáne orta bıznes nysandarynyń sany arta túsken. Búginde onyń sany 7 490-ǵa jetip, onda 17 250 adam jumyspen qamtylǵan. Shaǵyn orta bıznes sýbektileriniń shyǵarǵan ónim kólemi 22,1 mlrd teńgeni qurap otyr. Osy shaǵyn jáne orta bıznesti qoldaý maqsatynda aýdanda 807 joba túrli qarjylyq uıymdarmen 1 612 mln teńgege, al 10 joba «Qarapaıym zattar ekonomıkasy» memlekettik baǵdarlamasy aıasynda «Agrarlyq nesıe korporatsııasy» AQ 408,3 mln teńge jeńildetilgen nesıe bergen»,- deıdi Nurbol Turashbekov.
Aýdan ákimi sondaı-aq, tabıǵaty kórkem aýdanda týrızm salasy da damyp jatqanyn jetkizdi. Ótken jyly aýdanǵa 17067 týrıst kelse, onyń 1 215-i - shetel azamattary.
«Aýdanda kórikti jerlerdiń tizimi jasalyp, týrısterge tanystyrý maqsatynda arnaıy marshrýttar qurylǵan. Ótken jyly aýdan aýmaǵyndaǵy «Batys Eýropa – Batys Qytaı» jol boıynan «Jol boıynda qyzmet kórsetý» jobasy iske assa, Qaraǵashty aýylynda etnoaýyldyń qurylysy júrýde. Aýdan aýmaǵyna shyǵys qaqpadan kireberiste jolda qyzmet kórsetý ortalyǵy iske qosyldy. Ol ortalyq jolaýshylarǵa jáne týrısterge arnalǵan zamanaýı qonaqúımen, avtoturaq, ashana, kafe jáne janar-jaǵarmaı quıý beketi qyzmetterimen qamtylǵan», - dedi Nurbol Turashbekov.
Sondaı-aq aýdanda «Etno Park Resort» jobasy boıynsha qurylys jumystary júrgizilýde. Jobada týrısterdi qabyldaý, gıd aýdarmashy, konferents zal, oblystyq jáne aýdannyń týrıstik marshrýtyna engen nysandarǵa saıahat qyzmetteri qaralǵan. Jańadan 15 adamǵa jumys orny ashylady.
Jospar boıynsha kúnine 30, jylyna 1000 týrıstke qyzmet kórsetiledi dep kútilýde. Bul joba bıyl iske asyrylýy tıis. Aýdan turǵyndary sapaly aýyzsýmen qamtylǵan. Apatty jaǵdaıdaǵy mektepterdiń máselesi túbegeıli sheshilgen. Balabaqshamen qamtý 100% paıyzǵa oryndalyp otyr.
Jıynǵa qatysqan oblys ákiminiń orynbasary Ulan Tájibaev jáne jaryssózge shyqqan aýdandyq ardagerler keńesiniń tóraǵasy Sátbaı Qasymbekov, qoǵamdyq keńes tóraǵasy Ótepbaı Mátkárimov atqarylǵan jumystar jóninde pikirlerin ortaǵa salyp, aýdan ákiminiń jumysyna oń baǵa berdi.
