Túlkibas turǵyndary ortalyqtandyrylǵan aýyz sýǵa qol jetkizdi
ShYMKENT. QazAqparat - Ońtústik Qazaqstan oblysy, Túlkibas aýdany turǵyndarynyń 96 paıyzdan astamy ortalyqtandyrylǵan aýyz sý qubyrymen qamtamasyz etilgen. Bul týraly aýdan ákimi Nurbol Turashbekov halyq aldyndaǵy esepti kezdesýinde málim etti, dep habarlaıdy QazAqparat tilshisi.
Ákimniń sózinshe, taýly aýdandaǵy 62 eldi mekenniń 59-y, ıaǵnı 107 myńnan astam halyq taza aýyz sýmen qamtylǵan. Al qalǵan úsh eldi mekenge tirshilik nári tasymaldanyp jetkiziledi. Sebebi, bul aýyldar shalǵaıda ornalasqandyqtan jáne halyq sany az bolǵandyqtan qubyr tartý ekonomıkalyq jaǵynan tıimsiz.
Al, aýdannyń negizgi áleýmettik-ekonomıkalyq damý kórsetkishteri boıynsha júıeli sharalar atqarylyp, mejelengen maqsatty kórsetkishterge qol jetkizilgen. Aýdan basshysy jalpy óńirlik ónim ótken jyldyń qorytyndysymen 68,8 mlrd teńgeni quraǵanyn atap ótti.
«Aýdan kólemindegi ónerkásip kásiporyndary 22,7 mlrd teńgeniń ónimi óndirilse, osy sala boıynsha barlyq damý ındıkatorlary oryndaldy. Shaǵyn jáne orta bızneste 17 myń 200 adam jumys atqarýda. Belsendi kásipkerlik sýbektilerdiń sany 6310 birlikke jetip, 7,3 paıyzǵa óskenin kórsetip otyr. Óndirilgen ónim kólemi 34,2 mlrd teńgeni qurasa, olarmen tólengen salyq tólemderi 272,6 mln teńge boldy», - dedi Nurbol Turashbekov.
Esepti jıynǵa qatysqan oblys ákimi apparatynyń basshysy Áýelhan Turǵymbekov shaǵyn jáne orta kásipkerliktiń qarqyn alǵanyn jáne taýly aımaqtyń baý sharýashylyǵyn damytýǵa múmkindigi mol ekenin atap ótti. Jalpy jınalǵan jurtshylyq aýdan ákiminiń atqarǵan jumysyna oń baǵasyn berdi.
