Túlkibas pen Saıram aýdandyq aýrýhanalary jańa ottegi kontsentrattarymen tolyqty
TÚRKІSTAN. QazAqparat – Túrkistan oblysynyń Túlkibas pen Saıram aýdandyq aýrýhanalary jańa ottegi kontsentrattarymen tolyqty. Naýqastardyń tıisti deńgeıde em qabyldaýyna jany jomart jandar men biraqatar kompanııalar da atsalysýda, dep habarlaıdy QazAqparat tilshisi.
Máselen, Túlkibas aýdanynyń ortalyq aýrýhanasyna «QazMunaıGaz» Ulttyq kompanııasy 10 dana ottegi kontsentratoryn tabystady. Buǵan deıin aýdan ákimdiginiń uıytqy bolýymen túlkibastyq eriktiler tarapynan ortalyq aýrýhanaǵa 360 dana arnaıy medıtsınalyq kıimder, 210 ottegi balony, 2 dana ottegi kontsentratory jetkizilgen bolatyn. Sondaı-aq, aýdan eriktileri tarapynan medıtsına salasynyń qyzmetkerlerine túski astar uıymdastyrylyp keledi. Qazirgi tańda aýdandyq aýrýhanada jalpy 13 ottegi kontsentratory bar. Budan bólek, bir mezette 55 naýqas ottegimen dem ala alatyn núkteler ornatylǵan. Al, Saıram aýdanynyń ımamdary eldegi ıgi bastamany jalǵastyryp 3,5 mln teńgege medıtsınalyq jabdyq alýǵa demeýshilik tanytty. Olar naýqastyń ókpesine baryp turǵan otteginiń shamasyn anyqtaıtyn pýlsoksımetrdiń 10 danasyn, «Bobrov» ottegi kontsentratynan 10 dana jáne 10 redýktor alyp berdi. Atalǵan medıtsınalyq jabdyqtardy Saıram aýdandyq aýrýhanasy men emhanasyna Túrkistan oblysy boıynsha bas ımam Musabek qajy Aqtamberdi tabystady.
