Túlkibas aýdanynyń turǵyny gaz urlaımyn dep isti boldy
Gazben jabdyqtaý júıesine ruqsatsyz qosylý, kógildir otyndy urlaý qylmystyq quqyq buzýshylyqqa jatatynyn kóp adam bile bermeıdi.
Túrkistan oblysy Túlkibas aýdany M.Jarymbetov aýylynda osyndaı áreketke kináli adamǵa iri aıyppul salynyp, qylmystyq jaýapqa tartyldy.
Bul qylmystyq oqıǵa bylaı damydy. Ótken jyldyń qańtar aıynda O. esimdi azamat tutynatyn tabıǵı gazdy tegin paıdalanýdyń jolyp tapqan. Ózine jáne aınalasyndaǵylarǵa qaýip tóngenine qaramastan, ol úıiniń tusynan ótip turǵan gaz qubyryn eki jerden tesip, oǵan temir qubyr, rezeńke shlang bekitip, «QazTransGaz Aımaqqa» uıymyna tıesili gazdy zańsyz paıdalana bastaǵan.
Eń qyzyǵy, uryny gaz sharýashylyǵynyń mamandary eki ret ustap, gazdan ajyratqanymen ol kórshi gaz qubyryna zańsyz qosylyp, kógildir otyndy urlaýyn jalǵastyra bergen. Bir jyl ishinde osyndaı jolmen urlanǵan gaz kólemi 400 myń teńgege jýyqtaǵan
Aqyr sońynda, qylmystyq is qozǵalyp, is sotqa jetti. Sot azamat O. Qazaqstan Respýblıkasy Qylmystyq kodeksiniń 188-babynyń 1-bóliginde kózdelgen qylmystyq quqyq buzýshylyq jasaǵany úshin kináli dep tanydy jáne oǵan bir jyl merzimge bas bostandyǵynan aıyrý túrindegi jaza taǵaıyndady. Bul rette, sot gaz taratýshy mekemeniń azamattyq talap-aryzyn tolyq qanaǵattandyrdy.
«Aıta ketý kerek, kógildir otyndy urlaý faktisinen basqa, turmysta gazdy paıdalaný erejelerin buzý eń aýyr zardaptarǵa ákelýi múmkin. Paıdalaný erejelerin, qaýipsizdik tehnıkasyn saqtamaı ruqsatsyz oıyp qosý gazdyń taralýyna, baıaý jınalǵan jerdegi kontsentratsııa artqan kezde joıqyn jarylysqa ákelýi múmkin. Onyń saldary aýyr, tipti órt bolyp, adam ólimine soqtyrýy ábden múmkin»,-deıdi mamandar.