Túlkibas aýdanynyń ákimi turǵyndardy jeke máselelerimen qabyldady

TÚLKІBAS. QazAqparat – Túrkistan oblysy, Túlkibas aýdanynyń ákimi Nurbol Turashbekov turǵyndardy jeke máselelerimen qabyldady. Bul shara memlekettik organdarda respýblıkalyq biryńǵaı azamattardy qabyldaý aıasynda uıymdastyryldy, dep habarlaıdy QazAqparat tilshisi.

Memleket basshysy Qasym-Jomart Toqaevtyń «Syndarly qoǵamdyq dıalog – Qazaqstannyń turaqtylyǵy men órkendeýiniń negizi» atty Qazaqstan halqyna arnaǵan Joldaýynda «Halyq únine qulaq asatyn memleket» tujyrymdamasyna erekshe nazar aýdarylǵan bolatyn. Ondaǵy basty maqsat halyqpen tikeleı qatynas ornatý bolyp tabylady. Osy baǵytta qoǵamdyq qabyldaýda aýdan basshysy tańǵy saǵat 9:00-den keshki 19:00-ge deıin jeke qabyldaý ótkizdi. Ákimniń qabyldaýynda bolǵan turǵyndar turǵyn úı, áleýmettik kómek, qurylys jáne jumys máselelerin kóterdi.

Qabyldaý barysynda aýdan ákimi árbir turǵynnyń jeke máselesin tyńdap, birqataryna zańdylyqqa sáıkes jaýap berdi. Sondaı-aq, birqatar jumys suraýshylardyń máselesin sheshý úshin tıisti bólim basshylaryna tapsyrmalar júktedi. Al, áleýmettik kómek suraǵan aýdan turǵynyna múmkindiginshe kómek jasalatynyn jetkizdi.

Turǵyn úı máselesin aıtyp kelgen azamattarǵa turǵyn úı qatynastary týraly zańynyń sheńberinde túsindirme jumystaryn júrgizdi.