Túlkibas aýdanynda jyldyń sońyna deıin 6 mádenı nysan jańartylady
NUR-SULTAN. QazAqparat - Túlkibas aýdanynda kóp jyldan beri tozyǵy jetken mádenı nysandarda qaıta jóndeý jumystary júrgizile bastady, dep habarlaıdy oblystyq ákimdiktiń baspasóz qyzmeti.
Elbasy Nursultan Nazarbaevtyń «Bolashaqqa baǵdar: rýhanı jańǵyrý» baǵdarlamalyq maqalasy aıasynda qolǵa alynǵan ıgi bastama, aýyl turǵyndary rýhanı azyq alatyn nysandardyń mańyzdylyǵyn taǵy bir ret aıshyqtap berdi. Sonyń nátıjesinde, aýdandyq bıýdjet esebinen Eltaı, Januzaq, Kókbulaq, Alǵabas, Rusqul aýyldyq klýbtaryna kúrdeli jóndeý jumystary, al Sarytór aýyldyq mádenıet úıinde aǵymdaǵy jóndeý jumystary qarqyndy júrgizilýde.
100-den asa adamǵa eseptelgen mádenıet oshaqtarynyń aýmaqtary da tolyǵymen qorshalyp, abattandyrylatyn bolady. Qaıta jańǵyrǵan mádenı nysandarda aýyl jastary mýzykalyq jáne basqa da úıirmelerge qatysyp, bos ýaqyttaryn tıimdi paıdalana alady. Ol úshin barlyq jaǵdaı jasalynbaq. Ǵımarattar bıylǵy jyldyń jeltoqsan aıynda paıdalanýǵa beriledi dep kútilýde.
