Túlkibas aýdanynda «Jastar alleıasynyń» ashylý saltanaty ótti

TÚLKІBAS. QazAqparat – Túrkistan oblysy, Túlkibas aýdanynda «Jastar alleıasy» paıdalanýǵa berildi. Jastar jylyna oraı salynǵan nysannyń ashylý saltanatyna aýdan ákimi Nurbol Turashbekov pen oblystaǵy ardager, zııaly qaýym ókilderi men jergilikti turǵyndar qatysty, dep habarlaıdy QazAqparat tilshisi.

Aýdan ortalyǵyndaǵy Tuńǵysh Prezıdent saıabaǵynda oryn tepken alleıany aýdan basshylary men qonaqtar saltanatty túrde ashty. Bul demalys ornyn salý bastamasy aǵymdaǵy jyldyń aqpan aıynda aýdan ákimdiginiń uıytqy bolýymen qolǵa alynǵan bolatyn. Túlkibas jerinde ótken «Jastar jalyny» atty jastar forýmynda aýdannyń belsendi jastary tarapynan osyndaı usynys túsken. Forýmda kóterilgen másele aýdan ákimi Nurbol Turashbekovtyń nazarynan tys qalmaı, júzege asty. Onyń qurylys jumystary qolǵa alynyp, tolyǵymen aıaqtalǵan. Alleıada jastardyń serýendeýine barlyq jaǵdaı jasalǵan. Nysannyń ashylý saltanatyna kelgen qonaqtar jańadan otaý qurǵan jas otbasylarǵa neke kýálikterin tapsyrý rásiminiń kýási bolyp, alleıa aýmaǵyna aǵash kóshetterin otyrǵyzdy.

«Aýdanymyzda elimizdiń bolashaǵy jastar úshin sapaly bilim alyp, sportpen shuǵyldanýǵa barlyq jaǵdaılar jasalǵan. Máselen, bıylǵy jyly Azattyq eldi mekeninen 600 oryndyq jańa mektep bilim kúnine paıdalanýǵa berilse, taǵy jeti birdeı mektepke kúrdeli jóndeý jáne qosymsha ǵımarat salý jumystary júrgizilýde. Sondaı-aq, Sastóbe kentinen 240 jas bir mezette sporttyń alýan túrimen shuǵyldana alatyn sport kesheni men aýdan ortalyǵyndaǵy sport mektebi janynan jańa kúres zaly ashyldy. Sol sııaqty «Jankent» móltekaýdanynan jańa kishi fýtbol alańy, oıyn jáne «Strıt vorkaýt» alańshalary aýdan jastarynyń ıgiligine paıdalanýǵa berildi»,- dedi jıynda aýdan ákimi.

Aıta keteıik, taýly aýdanda 14 pen 29 jas aralyǵyndaǵy 28 myńnan astam jas bar. Sonyń ishinde 16 myńnan astamy túrli salada jemisti eńbek etýde. Al, 11 myńnan astam jas orta jáne joǵary oqý oryndarynda bilim alýda.