Túlkibas aýdanynda tozyǵy jetken eki mektep buzylyp, ornyna jańasy salynady

TÚLKІBAS AÝDANYN. QazAqparat - Túrkistan oblysynyń Túlkibas aýdanyndaǵy tozyǵy jetken 2 mekteptiń ornyna jańa ǵımarattar salynady. Oblys ákimi Ómirzaq Shókeev aýdanǵa jasaǵan saparynda tapsyrma berdi, dep habarlaıdy QazAqparat oblysy ákiminiń baspasóz qyzmetine silteme jasap.

Oblys ákimi Túlkibas aýdanyna jumys saparymen baryp, áleýmettik nysandardyń jumysymen tanysyp, aýdan turǵyndarymen kezdesti.

Eńbekshi aýylyndaǵy tozyǵy jetken mektep kezinde asarmen salynǵan. Іrgetasy shógip, jalǵanǵan qosymsha bólmeleri jaryla bastaǵan. Bala sanynyń artyp ketýine baılanysty, birqatar oqýshy kórshi aýyldaǵy mektepke qatynap oqıdy. Oqý protsesin jaqsartyp, oqýshylarǵa sapaly bilim berý maqsatynda jergilikti bıýdjetten qarjy bólindi. Endi 150 oryndyq N.Tursynbekov atyndaǵy negizgi mektep buzylyp, ornyna jańa ǵımarat boı kóteredi.

Maılykent aýyl okrýgine qarasty T.Rysqulov aýylynda da 300 orynǵa arnalǵan mektep qurylysy bastalmaq. Bilim uıasy búginde «Túlkibas agrobıznes jáne saıahat kolledjiniń» eski, mektep ǵımaratynyń talaptaryna sáıkes kelmeıtin zerthanalyq korpýsynda ornalasqan. Munda qazir Turar Rysqulov aýylyndaǵy 3 móltek aýdannyń oqýshylary bilim alýda. Mektep qurylysyna 1,92 ga jerge qujaty daıyndalyp, jergilikti bıýdjet esebinen jańa mektep boı kóteretin bolady.

Aımaq basshysy Ómirzaq Shókeev tıisti basqarma basshylaryna bilim salasyna qatysty osynaý ózekti máseleni qatań qadaǵalap, qurylystyń ýaqytyly ári sapaly júrgizilýin baqylaýdy tapsyrdy.