Túlkibas aýdanynda «Keńeıtilgen ata-analar keńesiniń» jıyny ótti
TÚLKІBAS. QazAqparat – Túrkistan oblysy Túlkibas aýdanynda «Keńeıtilgen ata-analar keńesiniń» jıyny ótti. Aýdan ortalyǵyndaǵy mektep-gımnazııada uıymdastyrylǵan basqosýda óskeleń urpaqty durys tárbıeleý máseleleri talqylandy, dep habarlaıdy QazAqparat tilshisi.
Jıynǵa oblystyq ata-analar komıtetiniń tóraǵasy Beıse Belasharuly men oblystyq bilim salasynyń qyzmetkerleriniń kásipodaǵy jáne ardagerler keńesiniń tóraǵasy Nyshan Tasbolatuly men Saıram aýdany qoǵamdyq kelisim keńesiniń tóraǵasy, «Ákeler mektebi» jobasynyń avtory Amangeldi Qabylbekov, aýdandyq bilim bóliminiń basshysy Erjan Iztaıuly qatysty.
Sonymen qatar, bilim berý mekemeleriniń tárbıe isi jónindegi orynbasarlary, ata-analar komıtetiniń tóraǵalary, qamqorshylyq keńesiniń jáne «Ákeler» mektebiniń basshylary shaqyryldy. Keńes barysynda kelgen qonaqtar balalardy bilimdi de mádenıetti, tárbıeli de ádepti, kishipeıil de qarapaıym etip tárbıeleýdiń joldaryn atap ótti. Osy taqyryp jónine ózara pikir almasyp, óz oılaryn talqyǵa saldy. Usynys pikirler tyńdaldy. «Ulttyq jańǵyrý degen uǵymnyń ózi ulttyq sananyń kemeldenýin bildiredi. Demek, rýhanı jańǵyrýdyń alǵashqy qadamy ata-babadan qalǵan salt-dástúr, ádet-ǵurpymyzdy órkenıetti qoǵamǵa saı jańartyp, jastardyń boıyna ımandylyq pen adamgershilikti darytýdan bastalmaq»,- dedi jıynǵa qatysýshylar.
