Túlkibas aýdanynda ereje buzǵan júrgizýshilerdiń kóligi aıypturaqqa qoıyldy
TÚRKІSTAN. QazAqparat – Túrkistan oblysyna qarasty Túlkibas aýdanynda áskerı boryshyn ótep kelgen jas jigittiń dostary ony kútip alý úshin avtosherý uıymdastyryp, jol boıynda apatty jaǵdaı týdyrǵan. Artynsha jol erejesin buzǵan júrgizýshiler anyqtalyp, avtokólikteri aıypturaqqa qoıyldy, dep habarlaıdy QazAqparat tilshisi.
Aıta keteıik, áleýmettik jelide Túlkibas aýdanyna qarasty aýyldardyń birinde jas jigitterdiń avtokólikpen sherý uıymdastyrǵan beınejazbasy taraǵan edi. Onda jas jigitterdiń djıp kólikteriniń syrtynda turyp, kóshe aralaǵany túsip qalǵan. Atalǵan oqıǵaǵa baılanysty Túlkibas APB qyzmetkerleri jedel- izdestirý jumystaryn júrgizip, nátıjesinde «Land Krýzer», «Aýdı» jáne «Foltsvagen Passat» kólikteriniń júrgizýshilerin anyqtaǵan. Olardyń barlyǵy jergilikti turǵyndar bolyp shyqty.
«Kináli júrgizýshiler jasaǵan isáreketterine sáıkes QR ÁQBtK-niń 595 baby 1 bóligimen jáne 434 babymen, 593-babymen tirkelip, ákimshilik hattamalar toltyrylǵan. Kólik tizgindeýshilerge aıyppul salynǵan. Avtokólikter arnaıy aıypturaqqa qoıylyp, óz kezeginde joǵaryda atalǵan kólik ıeleri halyqtan keshirim surap, aldaǵy ýaqytta qaıtalamaýǵa ýáde berdi», delingen habarlamada.
