Túlkibas aýdanynda «Densaýlyq festıvali» ótti
TÚLKІBAS. QazAqparat – Túrkistan oblysy Túlkibas aýdanynda «Densaýlyq festıvali» keń kólemde atalyp ótti. «Jeti qazyna» alleıasynda «Densaýlyq kórsetkishterine jet» degen uranmen ótken sharaǵa aýdan turǵyndary men sala mamandary qatysty, dep habarlaıdy QazAqparat tilshisi.
Festıvaldiń ashylý saltanatynda sóz sóılegen aýdan ákiminiń orynbasary E. Kúzembaev aýdan turǵyndaryna jáne qatysýshylarǵa jyly lebizin bildirdi. Atalmysh sharanyń basty maqsaty - salaýatty ómir saltyn ustanýǵa qoǵamnyń, buqara halyqtyń nazaryn aýdarý ekenin atap ótti.
Arnaıy uıymdastyrylǵan aktsııa barysynda turǵyndar men qonaqtar dáriger mamandardan keńes alyp, qaralýyna múmkindik aldy. Qan qysymyn, qandaǵy qant pen holesterınniń mólsherin anyqtap, okýlıst, hırýrg mamandaryna qaralyp, densaýlyǵynyń saýlyǵyn teksertti. Keleńsiz jaǵdaı oryn alǵanda jedel járdem kelgenshe alǵashqy medıtsınalyq kómek kórsetýdi qarapaıym halyqqa úıretý úshin arnaıy sabaqtar ótti.
Oblystyq salaýatty ómir saltyn qalyptastyrý ortalyǵynyń mamandary árbir turǵyndy densaýlyǵyna jaýapkershilikpen qarap, salaýatty, belsendi ómir saltyn ustanýǵa shaqyrdy.
Sondaı-aq, oqýshylar arasynda arqan tartý, asyq atý jáne basqa da sport túrlerinen jarys ótti. Aýdandyq ónerpazdar kontserttik baǵdarlamalar qoıyp, jınalǵan qaýymnyń kóńilin kóterdi.
