Túlkibas aýdanynda bir jylda 627 tonna jańǵaq jınaldy
TÚRKІSTAN. QazAqparat - Túrkistan oblysyna qarasty Túlkibas aýdanynda sońǵy 2 jyldyń kóleminde jańǵaq sharýashylyǵyn damytý jolǵa qoıyldy. Ótken jyly taýly aýdanda turǵyndar 627 tonna jańǵaq jınap aldy, dep habarlaıdy QazAqparat tilshisi.
Aýdan ákimdigi baspasóz qyzmetiniń málimetinshe, oblys ákiminiń tapsyrmasyna sáıkes 250 ga jerge jańǵaq otyrǵyzylǵan bolatyn. Jańǵaq ónimin jınaýdy aýdan turǵyndary endi jeke kásibi retinde iske asyrýda. Búginde aýdan ortalyǵyndaǵy bazar janynan qabyldaý pýnkteri ashylyp, jańǵaqtar 400-500 teńgeden satyp alynýda. Kásipkerler olardy qaıta óńdeýden ótkizip, qabyǵynan ajyratyp alady. Sóıtip daıyn bolǵan jemisti oblystyń iri saýda ortalyqtary men kondıterlik tsehtarǵa nemese basqa óńirlerge ár kelisin 1200-1500 teńgeden ótkizýde.
Aıta keteıik, elimizdegi jańǵaqtyń 85 paıyzy Almaty, Jambyl, Túrkistan oblystarynda ósiriledi. Soǵan baılanysty Qazaqstan grek jańǵaǵyn óndiristik ósirýge jáne eksportqa shyǵarýǵa baǵyt alyp, aldaǵy 2-3 jylda úsh aımaqtaǵy jańǵaq baýlarynyń kólemin 5 myń gektarǵa jetkizý josparlanýda. Óıtkeni munda óndiristik jańǵaq sharýashylyǵyn damytý úshin sheksiz múmkindikter bar. Máselen, qolaıly klımattyq jaǵdaılar, egistik jerler jáne jumys kúshi. Bul baǵytta fermerler men ǵalymdardyń tek birlesken kúshteri qajet. Otandyq ǵalymdardyń aıtýynsha, búginde osy óńirlerge Frantsııa, Polsha, Ispanııadan jańǵaqtyń óskinderi ákelindi. Mamandardyń pikirinshe jańǵaq baýynyń ár gektarynan 3 mln teńgege deıin paıda tabýǵa bolady.
