Túlkibas aýdanynda bir jylda 20 mlrd 761 mln teńgeniń ónimi óndirilgen
TÚRKІSTAN. QazAqparat - Túrkistan oblysy, Túlkibas aýdanynda 2018 jyly 20 mlrd 761 mln teńgeniń ónimi óndirilgen. Bul týraly aýdan ákimi Nurbol Turashbekovtyń Shaqpaq jáne Jabaǵyly aýyldyq okrýgi turǵyndary aldynda esep berý jıynynda aıtyldy, dep habarlaıdy QazAqparat tilshisi.
Kezdesý barysynda ákim 2018 jyly aýdan aýmaǵynda atqarylǵan jáne aldaǵy ýaqytta atqarylatyn jumystar týraly baıandama jasap, byltyrǵy jyly okrýg turǵyndary tarapynan aıtylǵan ýájder boıynsha atqarylyp jatqan jumystarǵa toqtaldy. Ótken jyldyń qorytyndysymen aýdan bıýdjetiniń kiris bóligi 17 mlrd 4 mln teńgeni quraǵan. Aýdanǵa tartylǵan ınvestıtsııalar kólemi 19 mlrd 191,1 mln teńge bolǵan. Tabıǵaty kórkem Túlkibas jerine 13 myńnan asa týrıst kelgen. Aýdanda kórikti jerlerdiń tizimi jasalyp, kelgen týrısterge aýdandy tanystyrý maqsatynda týrıstik marshrýttar quryldy. Al, «Batys Eýropa -Batys Qytaı» jol boıynda qazirgi tańda iri 3 jobanyń qurylysy júrýde. Olardyń qatarynda «Qurylys», «Shuqyrbulaq» jáne «Shaqpaq» jol boıy qyzmet kórsetý ortalyqtary bar. Sondaı-aq, tabıǵı emdik týrızmdi damytý maqsatynda aýdanda "Jaılaý" jáne Saýmalmen emdeý saýyqtyrý ortalyqtaryn salý qolǵa alynyp otyr.
Oblystyq bıýdjetten ınfraqurylym jumystaryna 103 mln tenge qarjy qarastyrylyp, qazirgi tańda 55 mln teńgesi bólindi. Aldaǵy ýaqytta «Etno Park» qurý jobasy júzege asyrylýda. Aýylsharýashylyq salasynyń ónim kólemi 31 590,4 mln teńgeni qurap, qazirgi tańǵa 65 406,4 ga ıgerilip otyr. Tamshylatyp sýǵarý ádisimen 500 ga jerge kókónis egilgen. Mal bordaqylaý baǵytynda 269 bordaqylaý alańy ashylyp, balyq pen qus ósirý sharýashylyqtary qarqyndy damýda. «Sybaǵa» baǵdarlamasy boıynsha 147 bas, «Qulan» baǵdarlamasymen 164 bas mal satyp alyndy.
Jıynda aýdan ákimi sondaı-aq, aýyl turǵyndarynyń qoıǵan suraqtaryna jaýap berdi. Áli kúnge sheshimin tappaı máselelerdi tyńdap, olardy oń sheshý jaǵyna da atsalysatynyn atap ótti.
