Túlkibas aýdanynda aýyl turǵynyn atqan kúdikti ustaldy
TÚLKІBAS. QazAqparat – Túrkistan oblysy, Túlkibas aýdanynda aýyl turǵynyn atqan kúdikti ustaldy. Tergeý barysynda ol jábirlenýshini bir tanysymen shatastyryp alǵanyn aıtqan, dep habarlaıdy QazAqparat tilshisi.
Oblystyq PD baspasóz qyzmetiniń málimetinshe, qylmystyq oqıǵa aýdan ortalyǵy T.Rysqulov aýylynda oryn alǵan. Aýdandyq aýrýhanaǵa jedel járdem qyzmetimen oq jaraqaty tıgen turǵyn jetkizilgen. Jedel-tergeý tobyna oqıǵany baıandaǵan jábirlenýshi úıinen shyqqanda esiginiń aldyna nómiri joq Mersedes kóligi kelip toqtaǵanyn aıtqan. Onyń ishinde otyrǵan belgisiz bireýlerdiń atqanyn, saldarynan jaraqat alǵanyn jetkizgen. Osydan keıin kúdiktini izdestirgen tártip saqshylary ony 12 saǵattan keıin qolǵa túsirdi. Tulǵasyn anyqtaý barysynda kórshi aýyldyń turǵyny ekeni anyqtaldy, ol jasaǵan qylmysyn moıyndaǵan. Kúdikti jábirlenýshini basqa bireýmen shatastyryp alǵanyn, onymen biraz ýaqyttan beri urys-keriste bolǵanyn aıtqan. Sondyqtan kek alý maqsatynda oq jaýdyrǵan bolyp shyqty.
«Ustalǵan turǵynnyń úıin tintý barysynda 16 kalıbrli ańshy myltyǵy tárkilenip, ýaqytsha tergeý abaqtysyna jabylǵan. Qazirgi ýaqytta osy jáıtke qatysty Qylmystyq kodekstiń «Buzaqylyq» babymen sotqa deıingi tergeý amaldary júrgizilýde», delingen habarlamada.
