Túlkibas aýdanynda apatty jaǵdaıdaǵy mektepterdiń máselesi túbegeıli sheshilgen
TÚRKІSTAN. QazAqparat - Túrkistan oblysy, Túlkibas aýdanynda apatty jaǵdaıdaǵy mektepterdiń máselesi túbegeıli sheshilgen. Balabaqshamen qamtý 97,8% paıyzǵa oryndalyp otyr. Bul týraly aýdan ákimi Nurbol Turashbekov Turar Rysqulov aýylynda ótken qorytyndy esep berý jıynynda atap ótti, dep habarlaıdy QazAqparat tilshisi.
2018 jyldyń áleýmettik-ekonomıkalyq damý kórsetkishteri týraly aıtylǵan esepti kezdesýge Túrkistan oblysy ákimi apparatynyń basshysy Áýelhan Turǵymbekov, aýdandyq máslıhat depýtattary men quqyq qorǵaý organdarynyń basshylary, aýyldyq okrýg - kent ákimderi men aýdandyq ardagerler jáne qoǵamdyq keńes tóraǵalary, aýdan turǵyndary men oblystyq jáne aýdandyq buqaralyq aqparat quraldarynyń ókilderi qatysty.
Jıynda aýdan basshysy aǵymdaǵy jyly alǵa qoıǵan negizgi mindetter týraly baıandady.
Onyń sózinshe, taýly aýdan turǵyndary sapaly aýyz sýmen qamtylǵan. Áleýmettik nysandar boı kóterip, joldar jóndelip keledi. Kósheler jaryqtandyrylyp, aýdan turǵyndarynyń áleýmettik jaǵdaıyna jáne kásipkerliktiń damýyna tikeleı áser etetin gaz salasy ońtaıly sheshimin tapqan. Sonymen qatar, aýdan ákimi barlyq eldi mekenderdegi esep berý jınalystarynda turǵyndardan túsken suraqtar, usynys-pikirlerdiń jáne memlekettik, óńirlik baǵdarlamalardyń sapaly, ýaqytyly oryndalýy qatań baqylaýda bolatynyn jetkizdi.
Kezdesýde Nurbol Turashbekovtiń baıandamasynan keıin sóz alǵan oblys ákimi apparatynyń basshysy Áýelhan Turǵymbekov Túrkistan oblysynyń 2018 jylǵy áleýmettik-ekonomıkalyq damýy men aldaǵy atqarylatyn jumystar barysyna toqtalyp ótti.
Óz kezegine aýdan turǵyndary tabysty atqarylǵan jumystar men alda atqarylatyn mindetterge oń baǵalaryn berdi.
