Túlkibas aýdanynda «Ana men bala» monýmenti ashyldy
TÚLKІBAS. QazAqparat – Túrkistan oblysy Túlkibas aýdany taǵy bir eskertkishpen tolyqty. Aýdan ortalyǵyndaǵy «Tuńǵysh Prezıdent» saıabaǵynyń aldynan «Ana men bala» monýmenti boı kóterdi, dep habarlaıdy QazAqparat tilshisi.
Tas músin taýly aýdannyń týmasy, ekinshi dúnıejúzilik soǵysynyń ardageri Jaılaý Piralıevtiń balalary men nemereleriniń qarjylandyrýymen ornatyldy. Mádenı nysannyń ashylý saltanatyna aýdan ákiminiń orynbasary E.Kúzembaev pen aýdandyq ardagerler, analar keńesiniń músheleri, zııaly qaýym men buqaralyq qural ókilderi qatysty. Monýmenttiń ashylý saltanatynda sóz alǵan aýdan ákiminiń orynbasary E.Kúzembaev óńirdiń kórkeıýine demeýshilik jasap otyrǵan azamattarǵa alǵysyn bildirdi.
«Elbasy «Bolashaqqa baǵdar: rýhanı jańǵyrý» atty baǵdarlamalyq maqalasynda «Basqa aımaqtarǵa kóship ketse de, týǵan jerlerin umytpaı, oǵan qamqorlyq jasaǵysy kelgen kásipkerlerdi, sheneýnikterdi, zııaly qaýym ókilderi men jastardy uıymdastyryp, qoldaý kerek», – degen edi. Osy maqsatta búgin demeýshilerdiń qarjylandyrýymen tatýlyq pen beıbitshiliktiń sımvoly sanalatyn «Ana men bala» monýmentin turǵyzyp, aýdan turǵyndaryna úlken syı jasap otyr. Bul azamattarǵa aıtar alǵysymyz sheksiz»,- dedi E.Kúzembaev.
Aıta keteıik, Túlkibas aýdanynda Elbasy N.Nazarbaevtyń «Bolashaqqa baǵdar: rýhanı jańǵyrý» maqalasy aıasynda demeýshiler esebinen birqatar kıeli jerler jańadan jańǵyrtylyp, eldimekenderde eskertkishter boı kóterýde. Máselen, 2018 jyly Alǵabas, Rysqul aýyldarynda ekinshi dúnıejúzilik soǵysyna attanǵan jaýyngerler men tyl eńbekkerleri, Batyr analardyń esimderi jazylǵan eskertkishter ashyldy. Al, ótken jyly aýdannyń 90 jyldyq mereıtoıyna oraı qoǵam qaıratkeri Turar Rysqulovtyń eskertkishi boı kóterip, Túlkibas stantsııasynda tuńǵysh qazaq ınjeneri Muhamedjan Tynyshbaev pen bala Turar Rysqulov beınelengen tas músin ornatyldy.
