Túlkibas aýdanynda 74 otbasy baspanaly boldy
ASTANA. QazAqparat - Jańa jyl merekesi qarsańynda Túlkibas aýdanynda 74 otbasy qonys toıyn toılady. Saltanatty sharaǵa arnaıy qatysqan óńir basshysy Janseıit Túımebaev qýanysh ıelerin quttyqtap, páter kiltin tabys etti, dep habarlaıdy Túrkistan oblysy ákimdiginiń baspasóz qyzmeti.
Sastóbe kentindegi 32 páterlik eki kópqabatty turǵyn úıdiń qurylys jumystaryn merdiger mekeme «Korporatsııa AQ ordasy» JShS júrgizgen. Jalpy quny 298,9 mln. teńge. Jalpy bul turǵyn úıler baspana kezeginde turǵan ata-anasynan aırylǵan balalarǵa, bıýdjettik qyzmetkerlerge, jalǵyz basty otbasylarǵa berildi.
Aıta keteıik, aýdanda 1600-den astam azamat úı kezegine turǵan. Keler jyly sonyń 60-na páter kilti tabystalady dep kútilýde.
Sonymen qatar, Balyqty aýylynda eki qabattan turatyn 10 páterli áleýmettik qyzmetkerlerge arnalǵan úı paıdalanýǵa berildi. Onyń qurylys jumystarymen merdiger mekeme - «Evro Remont Servıs» JShS aınalysqan.
2019 jyly Turar Rysqulov aýylynda qosymsha taǵy eki qabatty 10 páterli turǵyn úı paıdalanýǵa beriledi. Memlekettik qyzmetkerlerge arnap salynyp jatqan baspana aýdanǵa jumys isteýge kelgen jas mamandarǵa úlestiriletin bolady.
