Túlkibasta úı, Sozaqta saıabaq: Túrkistan oblysynda túlekter mereıtoıdy erekshe atap ótti
TÚRKІSTAN. KAZINFORM – Túlkibas jáne Sozaq aýdandarynda mektep bitirgenderine 20 jyl tolǵan túlekter týǵan jerlerine tartý jasap, muqtaj jandardyń alǵysyna bólendi.
Túlkibas aýdanyndaǵy Abaı atyndaǵy mektep-lıtseıi men B.Sadyqov jáne Lomonosov atyndaǵy mektepterdiń 2005 jylǵy túlekteri birigip, áleýmettik jaǵdaıy tómen jas otbasyǵa úı syılady. Aýdan ortalyǵynan berilgen alty bólmeli baspananyń quny – 9 mln teńge. Jalpy jınalǵan qarajat 13 mln teńgeden asqan. Qalǵan soma jóndeý jumystary men turmystyq tehnıka, jıhaz alýǵa jumsalǵan.
Saltanatty is-sharada 300 adamǵa arnap qudaıy as berilip, jańa úıdiń kilti Qarataevtar otbasyna tabystaldy. Otaǵasy – І top múgedegi. Al, otbasy buǵan deıin jaldamaly páterde turyp kelgen.
Óz kezeginde aýdan ákiminiń orynbasary Erbol Ormanov, aqsaqaldar keńesiniń tóraǵasy Qalmat Anashev, ardager ustazdar men túlekter júrekjardy tilekterin bildirdi. Aýdan ımamy Kárim Baıbolov marqum túlekterge Quran baǵyshtap, qaıyrymdylyq jasaǵan jandarǵa alǵysyn aıtty.
Jalpy Túlkibas aýdanynda túlekterdiń úı syılaý úrdisi dástúrge aınalǵan. 2016 jyly dál osy mekteptiń 1996 jylǵy túlekteri alǵash ret úı syılap, ıgi bastamanyń negizin qalaǵan bolatyn. Bıylǵy is-sharada 2005 jylǵy túlekter estafetany 2006 jylǵy túlekterge tabystady.
Aıta keteıik, mundaı ıgilikti is Túlkibas kentinde de jalǵasyp, taǵy eki muqtaj otbasy baspanaly bolmaq.
Al, Sozaq aýdanyndaǵy «Sozaq» mektep-gımnazııasynyń 2005 jylǵy túlekteri týǵan aýyldaryna demalys saıabaǵyn salyp berdi. Saıabaqtyń ashylý saltanatyna Túrkistan oblystyq máslıhat depýtaty Begimbet Baıǵarev, aýdan ákiminiń orynbasary Altyn Eshanqulova qatysty. Aýyl aqsaqaldary men turǵyndar túlekterge alǵystaryn aıtyp, aq batalaryn berdi.
Aıta keteıik, budan buryn Aqtaýlyq oqýshy «Mektepke aparar qaýipsiz jol» jobasyn ázirlegenin jazǵan bolatynbyz.