Túlkibasta qyzdy qaqqan kólik júrgizýshisiniń polıtsııaǵa qatysy joq - polıtsııa departamenti

TÚRKІSTAN. KAZINFORM – Túlkibas aýdanynda bolǵan jol-kólik oqıǵasy saldarynan kámelet jasqa tolmaǵan qyz zardap shekti. Bul týraly Túrkistan oblysy polıtsııa departamentiniń baspasóz qyzmeti málimdedi.

Áleýmettik jelide taraǵan aqparatqa súıensek, joǵary jyldamdyqpen kele jatqan kólik kámelet jasqa tolmaǵan qyzdy qaǵyp ketken. Kúdiktiniń kólik júrgizý kýáligi bolmaǵan jáne aýdandyq polıtsııa bólimi basshysynyń týysy bolǵandyqtan, tek ákimshilik sharamen ǵana jaýapqa tartylǵan. Qazir kámelet jasqa tolmaǵan qyz aýrýhanada em qabyldap jatyr. 

Atalǵan jaǵdaıǵa qatysty resmı aqparat taratqan Túrkistan oblysy polıtsııa departamentiniń baspasóz qyzmeti saraptama taǵaıyndalyp, barlyq mán-jaılardy anyqtaý boıynsha qajetti is-sharalar júrgizilip jatqandyǵyn jetkizdi. Sonyń nátıjesimen protsestik sheshim qabyldanatyn bolady.

«Kámeletke tolmaǵan velosıpedshiniń qatysýymen bolǵan jol kólik oqıǵasy boıynsha júrgizýshi anyqtalyp, jaýapkershilikke tartyldy. Kólik aıypturaqqa qoıyldy. Er adamnyń júrgizýshi kýáliginiń joqtyǵy týraly aqparat shyndyqqa janaspaıdy. Ol polıtsııa qyzmetkeriniń týysy emes jáne ishki ister organdaryna eshqandaı qatysy joq» - delingen vedomstva aqparatynda.