Túrkistan oblysynda jabdyǵy urlanǵan ındýstrıaldy aımaq jumys istemeı tur
TÚRKІSTAN. KAZINFORM — Túrkistan oblysynyń ındýstrıaldy aımaqtarynda urlyq buryn da bolǵan.
Búginde Túrkistan oblysynda aýmaǵy 1700 gektardan turatyn 14 ındýstrııalyq aımaq bar. Onyń ishinde beseýi 2024 jyldyń sońynda quryldy.
Atap aıtqanda, «Turbat», «Saýran», «Saryaǵash», «Keles» jáne «Saıram» ındýstrıaldy aımaǵynyń jalpy aýmaǵy — 1097 gektar. Sondaı-aq, Arys, Ordabasy aýdandarynda jekemenshik osyndaı aımaqtar bar.
Jalpy, óńirdegi ındýstrıaldy aımaqtarda búgingi kúni quny 120 mlrd teńge bolatyn 82 joba júzege asyp jatyr.
Munda kásipkerlerdi daıyn ınfraqurylymmen qamtý, tómen baǵada jer telimin qosalqy jaldaý, jer teliminiń kadastrlyq qunyn satyp alý (obektini paıdalanýǵa qabyldaý aktisin alǵannan keıin, jobalyq qýatyna shyqqan soń), tómen baǵada elektr energııasymen (1kVt — 25 teńge) qamtý qolǵa alynǵan.
Degenmen, keı aımaqtarda urlyqtyń saldarynan ındýstrıaldy aımaqtar jumysyn toqtatýǵa májbúr bolyp otyr.
«Turkistan ındýstrıaldy aımaqtardyń basqarýshy kompanııasy» jaýapkershiligi shekteýli seriktestigi usynǵan aqparatqa sensek, Túlkibas aýdanyndaǵy ındýstrıaldy aımaq búginde jumys istep turǵan joq.
Buǵan basty sebep — ınfraqurylym obektisinde 35 kVt qosalqy elektr stansasy modýldik qurylǵysynyń urlanýy.
— Qosalqy stantsııany qalpyna keltirý úshin, sondaı-aq qorshaý men kúzet beketin ornatýǵa jergilikti bıýdjetten 68,8 mln teńge qajet. Qaralyp jatyr. Búgingi tańda Túlkibas ındýstrıaldy aımaǵy «Qarqyn Treıd» JShS-men broıler etin óndirý jobasyn júzege asyrý boıynsha kelissóz júrgizip jatyr. Investıtsııa kólemi — 14,5 mlrd teńge, 268 jańa jumys orny ashylady dep josparlanyp otyr. Jobanyń jyldyq qýaty — jylyna 25 myń tonna qus etin óndirý, — delingen «Turkistan ındýstrıaldy aımaqtardyń basqarýshy kompanııasy» JShS bas dırektorynyń orynbasary Sh. Qalybek usynǵan aqparatta.
Indýstrıaldy aımaqtarda urlyq jaıty buryn da bolǵan. Munyń aldynda Qazyǵurt jáne Shardara ındýstrıaldy aımaǵynda jaryq júıleri urlanǵan. Qazirgi tańda nysandar tolyqtaı qalpyna keltirilipti.
— Jańa qurylǵan 5 ındýstrııalyq aımaqta ınfraqurylym qurylysyna jobalyq smeta qujattamasy ázirlenip jatyr. Túlkibas aýdanyn qospaǵanda qalǵan 9 aımaq tolyǵymen jumys istep tur. Bári ınfraqurylymmen qamtylǵan, — delingen kompanııa aqparatynda.
Aıta keteıik, budan buryn túrkistandyqtar qaı salanyń qyzmetine jıi shaǵymdanatynyn jazǵan bolatynbyz.