Túlkibas-Arys ýchaskesinde poıyz qozǵalysy qalpyna keltirildi
TÚRKІSTAN. KAZINFORM - Túlkibas-Arys ýchaskesinde júk vagondarynyń joldan shyǵyp ketý jaǵdaıy bolǵan jerde poıyz qozǵalysy qalpyna keltirildi. Bul týraly «Jolaýshylar tasymaly» AQ baspasóz qyzmeti málimdedi.
Keshiktirilgen poıyzdardyń jolaýshylary tamaq jáne aýyz sýmen qamtamasyz etildi. Jolda qalyp qoıǵan 492 jolaýshyny jetkizý úshin 5 avtobýs uıymdastyryldy. Júk vagondarynyń joldan shyǵyp ketý saldaryn joıýǵa úsh qalpyna keltirý poıyzy jáne 100-den astam temirjolshy jumyldyryldy.
«Kompanııa jolaýshylardan keltirilgen qolaısyzdyqtar úshin keshirim suraıdy jáne poıyzdardyń kidirý ýaqytyn qysqartý maqsatynda qajetti sharalardy qabyldap jatyr. Anyqtamalyq aqparatty «1433» tegin nómiri arqyly alýǵa bolady», - delingen «Jolaýshylar tasymaly» AQ baspasóz qyzmeti usynǵan aqparatta.
Aıta keteıik, buǵan deıin Túrkistan oblysynda júk poıyzy relsten shyǵyp ketkenin jazǵan bolatynbyz. Oqıǵa ornyna kelgen qutqarýshylar 150 sharshy metr jerdegi órtti joıdy.
Zardap shekkender men qaıtys bolǵandar joq.
Apat saldarynan 10 poıyz kesteden keshikti.
