«Tulǵany bıometrııalyq sáıkestendirý» avtomattandyrylǵan aqparattyq júıesi qurylýda
ASTANA. QazAqparat - QR Іshki ister mınıstrligi «Daktıloskopııalyq jáne genomdyq tirkeý týraly» zańdy iske asyrý boıynsha jobanyń bastalǵany týraly habarlady.
«Daktıloskopııalyq jáne genomdyq tirkeý týraly» Qazaqstan Respýblıkasynyń 2016 jylǵy 30 jeltoqsandaǵy Zańynyń talaptaryn iske asyrý sheńberinde Qazaqstan Respýblıkasy Іshki ister mınıstrligi daktıloskopııalyq jáne genomdyq tirkeýdi júzege asyrýǵa taǵaıyndalǵan «Tulǵany bıometrııalyq sáıkestendirý» avtomattandyrylǵan aqparattyq júıesin qurý máselelerin talqylaýda», - delingen QR ІІM-niń Facebook-tegi paraqshasynda.
Jobany iske asyrýdyń josparlanǵan kezeńi - 2018-2021 jyldar.
Osyǵan baılanysty, daktıloskopııalyq esep jáne genomdyq tirkeý júıelerin ázirleý men engizý salasynda tájirıbeli kompanııalar shaqyrylady.
«Bastapqy kezeńde usynylǵan sheshimderge baǵalaý júrgiziledi (baǵdarlamalyq qamtamasyz etý, serverlik jáne arnaıy jabdyqtaý, júıeniń jalpy sáýleti).
Barlyq usynylǵan sheshimderdi Qazaqstan Respýblıkasynyń múddeli memlekettik organdary ókilderinen qurylǵan jumys toby qarastyrady jáne baǵalaıdy.
Usynylǵan sheshimderdi baǵalaý nátıjeleri boıynsha Qazaqstan Respýblıkasynyń qoldanystaǵy zańnamasyna sáıkes konkýrstyq protsedýralarǵa qatysa alatyn kompanııalardyń tizimi qurylady.
Qosymsha aqparat alý, sondaı-aq usynystardy qaraý merzimderi men ýaqytyn kelisý úshin tómendegi adamdarmen baılanysqa shyǵý qajet», - delinedi habarlamada.
