Tulǵalyq qasıetin barynsha ashyp kórsetýge tyrystyq - Rejısser «Balýan Sholaq» fılmi jaıly
ASTANA. QazAqparat - 11 sáýirden bastap «Balýan Sholaq» fılmi jalpyulttyq prokatqa shyǵady. Kórermen kópten kútken fılm balýan ómiriniń qaı kezeńin qamtıdy? Túsirilim barysynda qandaı qıyndyqtar kezdesti? Bul týraly QazAqparat tilshisine fılm rejısseri Nurgeldi Sadyǵulov aıtyp berdi.
«Balýan Sholaq» fılmi 11 sáýirde jalpyulttyq prokatqa shyǵady. Kıno túsirilimi barysynda grafıka jaǵynan qınaldyq. Sebebi, akter Erkebulan Daıyrovtyń saýsaqtaryn «kesý» kerek boldy. Ár kadrda tutas saýsaqtary kórinip qalǵannan keıin Balýan Sholaqqa uqsatý úshin árbir kadr boıynsha jeke grafıkalyq jumys atqarýǵa týra keldi. Fılm 2017 jyly túsirile bastady. Sóıtip, sol jyldyń kúzinde montajǵa kirisip kettik. Ótken jyly montaj aıaqtalǵannan keıin dál osy grafıkalyq jumystar birshama ýaqytymyzdy aldy», - deıdi Nurgeldi Sadyǵulov.
Rejısserdiń aıtýyna qaraǵanda, Balýan Sholaqtyń rólin somdaǵan akter Erkebulan Daıyrov 10-15 keli salmaq qosqan. Balýannyń tulǵasyna barynsha uqsaý úshin akter kúres úıirmesine baryp, tamaqtaný rejımin qatań saqtapty.
«Erkebulan Daıyrov atqa jaqsy minetindikten, ol jaǵynan qıyndyq týǵan joq», - deıdi ol.
Nurgeldi Sadyǵulovtyń sózine qulaq assaq, fılm balýan babanyń ómirindegi bir ǵana epızodyn qamtıdy.
«Balýan Sholaq ómiriniń eń mańyzdy kezeńin, ıaǵnı Sábıt Muqanov jazyp qaldyrǵan, Muhtar Áýezov teatrynda qoıylyp júrgen «Jaýjúrek» pesasynda kórsetiletin oqıǵalardy barynsha qamtýǵa tyrystyq. Ol - jer daýyna baılanysty epızod. Tarıhta pereselenderdi (qonys aýdarýshylardy) ornalastyryp, qazaqtardy óz jerinen qýǵan kezeń bolǵany belgili. Fılmdi de soǵan baılanysty beıimdedik. Balýan Sholaqty bul rette jaı balýan nemese sazger, ánshi retinde ǵana emes, tulǵa retinde, elge, jerge degen mahabbatyn kórsetýge tyrystyq. Dýlat Isabekovtyń pesasynda onyń bári qamtylǵan. Balýan Sholaqtyń jer daýy kezinde «men bulaı kúlip-oınap júre almaıdy ekem» deıtini bar. Sol kórinister fılmge endi», - deıdi rejısser.
Nurgeldi Sadyǵulov osy aptadan bastap týyndy týraly jarnamalyq aktsııa bastalatynyn jarııa etti. Fılmniń tusaýkeseri Almaty men Astana qalasynda bir-eki kún erterek ótkenimen, 11 sáýirden bastap búkil respýblıka kınoteatrlarynda kórsetile bastaıdy.
Eske sala ketsek, 2017 jyly Sh.Aımanov atyndaǵy «Qazaqfılm» kınostýdııasy Mádenıet jáne sport mınıstrliginiń tapsyrysy boıynsha Dýlat Isabekovtiń stsenarııi negizinde Balýan Sholaq týraly tolyqmetrajdy kórkem fılm túsire bastaǵan bolatyn. Kınostsenarıı M.Áýezov atyndaǵy qazaq memlekettik akademııalyq drama teatrynda sahnalanǵan «Jaýjúrek» pesasynyń jelisi boıynsha jazylǵan.
