«Tulǵa teorııasy»: Jibek Joly arnasy derekti fılmder tsıklin bastady
ASTANA. KAZINFORM – Jibek Joly telearnasy kórermenge «Tulǵa teorııasy» atty jańa derekti fılmder tizbegin usynbaq. Jobanyń 12 qyrkúıekke josparlanǵan alǵashqy sany belgili akter, KSRO halyq ártisi, Qazaqstannyń Eńbek Eri Asanáli Áshimovke arnalyp otyr.
Jobanyń sınopsısinde derekti fılmder tizbegi qazaq halqynyń tarıhy men mádenıetinde, ǵylymy men ónerinde, memleket jáne qoǵam ómirinde aıshyqty iz qaldyrǵan ańyz tulǵalarǵa arnalatyny aıtylǵan. Baǵdarlama avtorlary el jadynda qalyp, ulttyq bolmys pen qundylyqtardyń saqtalýyna úles qosty dep esepteıtin jandardy iriktep alyp, solardyń kózin kórip, sózin estigen zamandastarynyń esteligi men syr-suhbatyn taspaǵa túsirip otyr.
Ujymnyń alǵashqy tańdaýy – Asanáli Áshimov. Bul derekti fılmde keıipkerdiń óz aýzynan tulǵa bolyp qalyptasý jolyndaǵy eń mańyzdy, eń áserli sátter baıandalady.
Buǵan deıin Jibek Joly telearnasy Silk Way Prime brendimen halyqaralyq naryqqa shyqqanyn jazǵan edik.